Халед Хоссейнидің «Жарқыраған мың күн» кітабы 2021 жылдың Жыл кітаптары тізіміне енді
Қазақстанда «Бір ел — бір кітап» республикалық акциясы 2007 жылдан бастап ҚР Ұлттық академиялық кітапханасы мен ҚР Кітапханалар қауымдастығының бастамасымен Қазақстан Республикасы Мәдениет және спорт министрлігінің қолдауымен өткізіліп келеді.
Акция қазақ әдебиетін танымал ету, тарихи, мәдени және рухани мұраны сақтау, жас ұрпаққа дұрыс адамгершілік-патриоттық тәрбие беру мақсатында өткізіледі.
2021 жылдың Жыл кітаптарын таңдау бойынша «Бір ел – бір кітап» акциясы комиссиясының кезекті отырысы өтті. Отырыс қорытындысы бойынша ел Тәуелсіздігінің 30 жылдығына орай, жалпыхалықтық оқуға «Тәуелсіздігіміздің 30 жылдығына – 30 кітап» рухани-мәдени акциясы ұсынылды. «Аударма» номинациясында «Фолиант» баспасынан жарық көрген Халед Хоссейнидің «Жарқыраған мың күн» кітабы бар. Аударған – халықаралық, республикалық жыр додаларының жүлдегері, ақын Төлеген Меллат.
Роман соңғы жарты ғасырда әлем назарын өзіне жиі аударған Ауған елінің ашық та тұңғиық өмір шындығын, тыныс-тіршілігін боямасыз бейнелейді. Соғыс өрті толастамаған, қараңғылық пен надандық үстемдік құрған қоғамдағы адам тағдыры мен әйелдер өмірін, махаббаттың мұң-наласын айшықты тілмен анық жеткізеді.
Оқиға Ауғанстандағы 20-ғасырдың екінші жартысындағы азаматтық соғыс төңірегінде өрбиді. Автор соғысты бізге әйелдер және аналар көзімен көрсетеді. Халед Хосейни шығыс мемлекетінің тұрмыс-тіршілігімен, тұрғындарының тағдырымен таныстырады. Адамдарының армандары мен қорқыныштарын, үміттері мен қасіретін баяндайды. Мінездері мен әлеуметтік жағдайлары әртүрлі, қасіреті мен мұңы бір екі әйелдің тағдыры ешкімді бей-жай қалдырмайды.
Мәриям – бай кәсіпкердің 15 жасында күштеп тұрмысқа шығарылған некесіз қызы. Лейлә – зиялы отбасында дүниеге келіп, жоғарғы білім алуды армандаған бақытты қыз. Соғыс атты зұлым күш екі тағдырды бір арнаға тоғыстырады. Ортақ қасірет негізінде құрылған достық та бар туындыда. Соғыс азаптарымен бірге, отбасындағы зорлық-зомбылық, мұсылман әйелдерінің құқықтары мен бостандықтары тақырыбы қозғалады.
«Жарқыраған мың күн» әлемнің көптеген тілдеріне аударылып, оқырманның ыстық ықыласына бөленген. Алғашқы екі кітабымен автор 2008 жылғы «Әлемдегі ең ықпалды жүз тұлға» тізіміне енген.
«Фолиант» баспасы
+7 771 166 4646
