ЭНЕРГЕТИКТЕР БАСЫМ ТҮСТІ

Ел Тәуелсіздігінің 22 жылдығына және Атырау энергокешенінің 50 жылдығына орай шайбалы хоккейден әуесқой командалар арасында халықаралық турнир өтті.
Турнирге алты команда қатысты. Атап айтсақ, Атырау қаласынан «Энергетик-Атырау», «Фантом», «Мұнайшы», «Прикаспиец» хоккей командалары мен ресейлік «Астрахан» және көршілес Орал қаласының «Орал» командалары бақ сынасты.
Жыл сайын дәстүрлі түрде өтіп келетін турнирдің ашылу салтанатына облыс әкімінің орынбасары Шыңғыс Мұқан қатысты.

– Тәуелсіздік күні қарсаңында Атырау энергокешенінің 520 жылдығына орай халықаралық деңгейде осындай үлкен турнир ұйымдастыру – құптарлық іс. Спортпен тек спортшылар ғана емес, мамандық түріне қарамастан қоғамның барлық мүшелері айналысуы тиіс. Бұл бастама өзге де сала қызметкерлеріне үлгі болады деп есептеймін, – деп Шыңғыс Жұмабекұлы жарысқа қатысушыларды жылдың басты мерекесі Тәуелсіздік күнімен құттықтады.
Сондай-ақ, «Атырау-жарық» АҚ директорының орынбасары Рахманов та сөз сөйлеп, көршілес облыстардан келген қатысушыларға «қош келдіңізін» жеткізіп, облыста хоккей спорты дамып келе жатқандығын, бұған өңірдің намысын абыроймен қорғап, чемпион атанып жүрген «Бейбарыс» хоккей командасының қосып жатқан үлесі зор екендігін айтып өтті. «Соларға қарап жастар бой түзейді, соларды үлгі тұтады», – дей келе, ол қатысушы командаларға сәттілік тіледі.
Үш күнге созылған турнирдің ақтық сынында оралдық командамен кездескен энергетиктер 5:4 есебімен жеңіске жетті. Ал, қола жүлдені «Прикаспиец» командасы еншіледі.

Баға берсеңіз
Атырау газеті
Пікір қалдырыңыз