Атырауда туберкулезбен күрес оң нәтиже көрсетуде
Туберкулезге шалдығу көрсеткіші Атырау облысында жылдан жылға азайып келеді. Бұл туралы бүгін «Қазақстанда туберкулезді тоқтату» ұлттық серіктестігін дамытуға арналған адвокациялық жиында айтылды. Жиынға облыс әкімінің орынбасары Жасұлан Бисембиев, ҚР Денсаулық сақтау министрлігінің Ұлттық ғылыми фтизиопульмонология орталығының директоры Мәлік Аденов, Атырау облыстық денсаулық сақтау басқармасының басшысы Қайсар Абдалиев, сондай-ақ отандық және халықаралық серіктестіктердің өкілдері қатысты.
Кездесу барысында облыстық фтизиопульмонология орталығының директоры Байтолла Ғазизов өңірдегі эпидемиологиялық жағдайға тоқталды. Оның мәліметінше, 2024–2025 жылдардың 7 ай қорытындысына сәйкес облыста туберкулездің негізгі көрсеткіштерінде тұрақты төмендеу байқалады. Мәселен, 2019 жылдан бері сырқаттанушылық деңгейі жыл сайын азайып келеді. Балалар мен жасөспірімдер арасындағы көрсеткіш айтарлықтай төмендеген. Белсенді топтағы науқастар саны өткен жылмен салыстырғанда 65 адамға азайды. Сондай-ақ, дәріге төзімді туберкулездің үлесі 2021 жылдан бері 7,9 пайызға төмендеген. Өлім көрсеткіші де қысқарып отыр: 2021 жылы 10,1 пайыз болса, 2022 жылы бұл көрсеткіш 4,9 пайызға дейін төмендеген.
Жергілікті бюджет есебінен туберкулезге қарсы күреске қомақты қаражат бөлініп отыр. Өткен жылдың 7 айында бұл мақсатқа 131,5 миллион теңге қарастырылса, 2025 жылдың осы кезеңінде 115,6 миллион теңге бөлінген. Бұл қаржы науқастарға әлеуметтік қолдау көрсетуге, профилактикалықшараларды күшейтуге жұмсалды.
Бұл ретте облыста туберкулез мәселесін алғаш рет көтерген «Мейірім-Қазақсан» үкіметтік емес ұйымының үлесі зор. Қордың атқарған жұмыстары мен жетістіктері туралы ұйымның директоры Диляра Абдрахманова кеңінен баяндады.
Сонымен қатар, жиналыста жоба үйлестірушісі Гүлназ Мұсабекова «Стоп ТБ» серіктестігін дамытудыңұлттық жоспары жөнінде сөз сөйлеп, азаматтық қоғамның белсенділігін арттыру бағытындағы ұсыныстарын жеткізді. Ал жиын қорытындысында Қазақстандағы «Стоп ТБ» ұлттық серіктестігінің төрағасы Шахимұрат Исмаилов пен облыстық денсаулық сақтау басқармасының басшысы Қайсар Абдалиев туберкулезді жоюға бағытталған ортақ күш-жігердің маңыздылығын атап өтті. Олардың айтуынша, бүгінгі жетістіктер – мемлекеттік органдардың, медицина мекемелерінің, үкіметтік емес ұйымдардың және халықаралық серіктестердің бірлескен жұмысының жемісі. Ең бастысы, ауруды азайтуға бағытталған бұл оң серпінді тоқтатпай, оны күшейте түсу қажет. Себебі дені сау ұрпақ – аймақтың да, елдің де болашағы.
Еркеназ ҚАЛИЖАН
