Ұлттық ойындар – халықтың рухани қазынасы

Елімізде өткен жылдан бастап Мемлекет басшысы Қасым-Жомарт Тоқаевтың бастамасымен Наурыз мейрамын тойлаудың жаңа форматы – жалпыұлттық «Наурызнама» онкүндігі енгізіліп, ерекше аталып өтуде. Ұлттық болмысымызды айрықшалауға арналған онкүндікке Атырау облыстық тарихи-өлкетану музейі мамандары да өз үлестерін қосты.

19 наурызда «Ұлттық ойындар – халықтың рухани қазынасы» тақырыбында өткен танымдық сабақ 20 наурыз – Наурызнама онкүндігінің Ұлттық спорт күніне арналды. Сабаққа қалалық  №12 Ф.Досымова атындағы орта мектебінің 3 «Б» сынып оқушылары мен ұстазы Анжела Утекеева қатысты.

Қазақтың ұлттық ойындары сан түрлі – ат спорты ойындарынан бастап үстел үстілік логикалық ойындарға дейін, тапқырлық пен ептілікті қажет ететін балалардың албырт ойындарынан бастап, үлкендердің күші мен қайсарлығын талап ететін ойындар. Оның негізінде спорт пен іс-қимыл ойындарының ұлттық түрлері жатыр. Көшпенді өмірдің қатаң жағдайында қазақ халқының өзінің дене тәрбиесі жүйесі қалыптасты. Ата-бабаларымыз көшпенді мал шаруашылығымен айналысатынына, кең далада өмір сүретініне сай, ұлттық ойындарымызды да соған сәйкес лайықтаған.

Балаларға қазақ халқының ұлттық ойындары туралы мәлімет беру арқылы білім-танымдарын кеңейту, ұлттық спортқа деген қызығушылықтарын арттыру, ұлттық құндылықтарды құрметтеу,  шапшаң қозғалуға, тапқырлыққа, мергендікке, ептілікке, күштілікке, жігерлілік, мықтылыққа баулып, адамгершіл болуға, бірін бірі сыйлай білуге, ұйымшылдыққа, достыққа тәрбиелеу мақсатында өткен бұл сабақтың тәрбиелік мәні мен маңызы зор болды. Себебі балалар ұлттық ойындар мен спорт түрлерін тек Наурыз мерекесінде ғана емес, күнделікті өмірде де ойнауға дағдыланды. Музейдің акт залында ойнауға лайықталып жоспарланған ұлттық ойындарға балалардың жас ерекшелігі ескерілді.

Сабақ барысында оқушыларға Ұлыстың Ұлы күні —  Наурыз мерекесін тойлаудың маңызы түсіндіріліп, ұлттық ойындардың түрлері, ұлттық ат спорты ойындары, күш сынасу ойындары, логикалық ойындар, мергендік ұлттық ойындары, ойын-сауық, тұрмыс-салт ойындары туралы слайд, бейнероликтер арқылы мәліметтер берілді. Сонымен қатар, балалармен «Бәйге», «Күш сынаспақ», «Көтермек», «Хан талапай», «Асық ату», «Бес асық», «Сақина салу», «Ләңгі тебу» ұлттық ойындары ойнатылып, «Асық» әні шырқалды. Сабақ соңында балалар «Қара жорға» әніне сергіту биін биледі. Ұлттық ойындарды ортада белсене ойнаудан жалықпаған балалар сабақты ұйымдастырушы музей маманы Эльмира Имашқызына сабақтан алған жақсы әрі қызықты әсерлерін айтып, кері байланыс жасады.  Ал музей маманы алтын уақыттарын бөліп келген оқушылар мен ұстазына, ата-аналарға алғысын білдіріп, естелік сыйлықтар табыс етті.

Эльмира ИБРАГИМОВА,

облыстық тарихи-өлкетану музейі этнография және табиғатты ғылыми-зерттеуді қамтамасыз ету бөлімінің маманы