Республикалық вокалистер байқауының жеңімпаздары анықталды
Атырау қаласында қазақ музыкасының көрнекті өкілк Болат Қохамановтың 60 жылдық мерейтойына арналған «Атырау — ардақты өлкем» атты республикалық вокалистер байқауының қорытынды гала-концерті өтті. Махамбет атындағы академиялық қазақ драма театрында өткен бұл іс-шара композитордың шығармашылығын дәріптеп, қазақстандық жас өнерпаздардың талантына құрмет көрсетуге арналды.
Болат Қохаманов – «Ерен еңбегі үшін» медалінің иегері, өз әндерімен тыңдарман жүрегін жаулаған тұлға. Ол туған өлкесі Атырауды әсем әнге бөлеп, ұлт мәдениетіне қосқан елеулі үлесімен ерекшеленеді. Байқау композитордың шығармашылығын кеңінен насихаттау мақсатында ұйымдастырылды.
Байқау қорытындысы бойынша бірнеше өнерпаз түрлі номинациялар бойынша марапатталды. Алғыс хат иегерлері ретінде Маңғыстау облысынан Ерлан Жақашев, Батыс Қазақстаннан Мира Сүндетова, Қызылорда облысынан Сұлтанханым Қолдаспай және тағы басқа талантты вокалистер аталды.
«Үздік аранжировка» номинациясы Айбар Ғаниұлына («Жер Ана» әні үшін) берілді. «Арнайы сыйлық» номинациясына Досжан Үби (Алматы) мен Ернар Дүйсеев (Ақтөбе) лайық деп танылды. «Үміт» номинациясын Ренат Гайсиннің атынан Батыс Қазақстан облысының өкілі Полина Сармина иеленді.
Жүлделі орындарға лайық деп танылған қатысушылардың арасында Атырау қаласынан Гүлсаят Габдулова мен Кентау қаласынан Ерік Төленов III орынды, Индер ауданының өкілі Мұратбек Жұмашев II орынды иеленді. Бірінші орынға Мержан Қабдолов (Атырау қаласы) лайық деп танылса, байқаудың бас жүлдесі Нұр-Сұлтан қаласының вокалисі Айдын Жұмабаевқа табысталды.
Марапаттау рәсімінен кейін байқау лауреаттары мен қазақстандық мәдениет майталмандары – Сембек Жұмағалиев, Марат Сарбупеев, Ренат Гайсин және басқа да танымал өнерпаздар сахнаға шығып, өз өнерлерін ортаға салды. Кештің шарықтау сәті композитор Болат Қохамановтың «Атырау-арман» әнін қатысушылардың бірлесіп орындауымен аяқталды. Бұл ән қазіргі уақытта аймақтың әнұранына айналғанын айта кету керек.
«Атырау — ардақты өлкем» вокалистер байқауы қазақ өнеріне жаңа серпін беріп, дарынды жастардың өз мүмкіндіктерін көрсетуге жағдай жасады. Болат Қохамановтың шығармашылығы мен оның рухани мұрасы алдағы уақытта да кеңінен дәріптелмек.
Тоғжан ЕРМЕК
Суреттерді түсірген Ерлан АЛТЫБАЕВ
