Республикалық дирижерлар конкурсының үздіктері анықталды
Атырауда Рыспай Ғабдиев атындағы ІІІ республикалық дирижерлар конкурсы мәресіне жетіп, әр өңірден келген 14 үміткер қатысқан байқау нәтижесінде жеңімпаздар анықталды. Үш күнге созылған өнер бәйгесінде талантты дирижерлер өз өнерлерін көрсетіп, жүлделі орындар мен арнайы марапаттарға ие болды.
Дина Нұрпейісова атындағы Атырау облыстық Академиялық қазақ халық-аспаптар оркестрі өкілдерінің хабарлауынша, конкурстың бас жүлдесі Қазақ ұлттық өнер университетінің «Дирижерлау» мамандығы бойынша I курс магистранты Дәулет Ғабитовке бұйырды. Жоғары өнерімен қазылар алқасын тәнті еткен ол осы беделді марапатқа лайық деп танылды.
Бірінші орын Атырау музыка колледжінің ұстазы, Дина Нұрпейісова атындағы халықтық музыка академиясының өкілі Сырым Қапаровқа табысталды. Өз өңірінің мақтанышы атанған Сырымның бұл жеңісі Атырау жұртшылығы үшін ерекше қуаныш.
Екінші орын иегерлері – Әбілхайыр Бейсеков пен Сәтқозы Мұхтар. Ал үшінші орынға Артур Қазиев, Жақсылық Нұрхожаев, Азамат Шынаров лайық деп танылды. Сонымен қатар, Абай Ракишов пен Дина Ардақ дипломант атағын иеленсе, арнайы жүлде Әлия Салиге табысталды.
Байқауға белсене қатысқан Алдияр Сабитов, Арнат Қабыл, Абзал Сали және Нұрғали Әшімхан Алғыс хатпен марапатталды.
Конкурс аясында Құрманғазы атындағы қазақ ұлттық халық аспаптар оркестрінің бас дирижері, «Дарын» мемлекеттік жастар сыйлығының иегері Абылай Тілепбергенов оркестрдің 90 жылдығына арналған төсбелгіні “Құрмет” орденінің иегері, өнер қайраткері Орақ Жауыровқа, сондай-ақ Дина Нұрпейісова атындағы академиялық қазақ халық аспаптар оркестрінің көркемдік жетекшісі және бас дирижері, «Дарын» сыйлығының лауреаты Болат Долдашовқа табыстады.
Алтыншаш ҚҰРМАШЕВА
