Құрылыс саласы қызметкерлеріне құрмет көрсетілді

Бүгін Махамбет Өтемісұлы атындағы облыстық академиялық қазақ драма театрында Құрылысшылар күніне арналған салтанатты жиын жоғары деңгейде ұйымдастырылды.

Кәсіби мерекеге орай өткен бұл іс-шара — құрылыс саласының ардагерлері мен мамандарына көрсетілген құрметтің айқын көрінісі болды.

Мерекелік жиын театр фойесінде басталып, қонақтарды Н.Жантөрин атындағы облыстық филармония ансамблі әуезді әнмен қарсы алды. Сонымен қатар фойе аумағында арнайы ұйымдастырылған шағын фуршет шараның мазмұнын толықтырып, қонақтардың көтеріңкі көңіл-күйін арттыра түсті.

Салтанатты кеш бейнероликпен басталып, «Top Dance KZ» ансамблі «Мен – құрылысшы» хореографиялық қойылымын ұсынды. Құрылысшы мамандығының маңызын өнер арқылы жеткізген бұл қойылым көпшілік көңілінен шықты. Одан соң жүргізушілер сахнаға шығып, жиналғандарды кәсіби мерекемен құттықтап, жиынды ресми түрде ашты.

Салтанатты жиында Атырау облысы әкімінің орынбасары Қайрат Нұртаев сөз сөйлеп, құрылысшыларды кәсіби мерекемен құттықтады:

– Құрылысшы – ұлт игілігіне қызмет ететін аса маңызды мамандық. Қазіргі таңда Атырау облысында құрылыс саласы қарқынды дамып келеді. Бұл – сіздердің маңдай терлеріңіздің, кәсіби шеберліктеріңіздің, ұлт алдындағы адал еңбектеріңіздің жемісі. Сіздердің қолтаңбаларыңыз бүгінде әрбір елді мекеннің келбетінен көрініс тауып отыр. Ел мүддесі үшін еткен еңбектеріңізге зор алғысымды білдіремін. Баршаңызға мықты денсаулық, баянды бақыт, жаңа кәсіби жетістіктер тілеймін, – деді Қайрат Талапұлы.

Салтанатты жиын барысында құрылыс саласына елеулі үлес қосып жүрген мамандар түрлі марапаттарға ие болды. Олардың қатарында Қазақстан Республикасы Премьер-Министрінің Бірінші орынбасары, Атырау облысының әкімі және облыстық мәслихат төрағасының атынан табысталған алғыс хат иегерлері бар. Марапатталғандар арасында еңбек ардагерлері, инженерлер, прорабтар, учаске шеберлері және сәулет бөлімдерінің білікті мамандары болды.

Марапаттау рәсімінен кейін салтанатты жиын концерттік бағдарламаға ұласты. «Мерует» үлгілі би ансамблі қазақ биін орындаса, Н.Жантөрин атындағы филармония әншісі Айбар Ғаниұлы әсерлі әнімен көрермен ықыласына бөленді.

Сонымен қатар, кеш қонақтарына арнайы келген эстрада жұлдыздары мен «Заман» тобының өнері мерекелік көңіл-күйді одан әрі жандандыра түсті.

Тоғжан ЕРМЕК

Суреттерді түсірген Ерлан АЛТЫБАЕВ