«Қасым хан» тарихи драмасы көрерменге жол тартты

Алтыншы-жетінші желтоқсан күндері Махамбет атындағы академиялық қазақ драма театры көрермендеріне жаңа қойылымның тұсаукесерін ұсынады. Қазақ хандығының тарихындағы ірі тұлғалардың бірі, ел бірлігін нығайтып, мемлекет қуатын арттырған Қасым хан туралы тарихи драма сахнаға шығады.

«Қасым хан» спектаклі белгілі драматург Асылбек Ихсанның шығармасы негізінде дайындалды. Қойылымды сахнаға қоюға еліміздің үздік мамандары тартылған. Атап айтқанда, режиссер Елік Нұрсұлтан, суретші Мұрат Сапаров, композитор әрі музыкант Бауыржан Ақтаев және сахналық трюктердің қоюшысы Еркін Мекебаев спектакльдің сапалы әрі әсерлі болуы үшін өз үлестерін қосты.

Қойылымға қатысқан актерлер мен режиссерлер көрерменге сол заманның шынайы бейнесін жеткізу үшін үлкен дайындықтан өткен. Режиссер Елік Нұрсұлтанның айтуынша, шығармашылық топ ежелгі Сарайшық қалашығына арнайы барып, тарихтың сырын сезініп, рухани күш алған. Бұл сапар оларды спектакльдің мазмұнын тереңірек түсінуге және Қасым хан дәуірінің ерекше атмосферасын ұғынуға шабыттандырған.

–Қойылым тарихи оқиғаларды емес, Қасым ханның тұлғалық қасиеттерін, оның шынайылығы мен адалдығын, отансүйгіштігі мен батылдығын көрсетуге бағытталған. Біз тарихқа емес, Қасым ханның адамгершілік қасиеттеріне басымдық бердік. Спектакль көрерменді терең ойға жетелеп, ұлттық рухты сезіндіруге арналған, – дейді Е.Нұрсұлтан.

Жайна МӘЛІМҚОЖА