Атырауда “Қыр баласының”премьерасы өтті (+фоторепортаж)

Ән өнерінің ішінде бард жанры – сырлы сазымен, жаңаша орындалу стилімен ерекше. Оны алғаш рет қазақ өнеріне енгізген Табылды Досымов еді. Махамбет атындағы академиялық қазақ драма театрында жас драматург Әлішер Рахаттың халқымыздың біртуар талантты ұлының өмірі мен шығармашылығына арналған “Қыр баласы” қойылымы сахналанды.

Қойылымда бард ақынның студенттік шағы және өнердегі өсу жолы, жалпы тарпаң тағдыры суреттелді. Сонымен қатар, әсерлі әндері шырқалып, өлеңдері де оқылды.

— Осы драманы сахналау арқылы Табылды ағамыздың жаңа қырларын танытқымыз келді. «Биіктік» әнінің мазмұны – қойылымның басты идеясы болды, — деді театрдың көркемдік жетекшісі Темірбек Мұхтаров.

Қойылымның қоюшы режиссері Шағуан Үмбетқалиев спектакльде ақынның шығармашылығын жаңғыртып, оның рухани мұрасын жастарға насихаттау арқылы ұлттық мәдениетке деген құрметті арттыру көзделгенін атап өтті.
Атыраулықтар қойылымда ақынның жүрегінен туған терең мағыналы өлеңдері мен әндерінің сахналық интерпретациясын тамашалады. Тау тұлғаның азаматтық және ақындық болмысын сәтті аша білген шығармашылық ұжымның кәсіби шеберлігін ерекше айта кеткен жөн. Жан тебірентіп, көңіл пернелерін дөп басқан қойылымды көзіне жас ала отырып тамашалаған көрермендер бір сәтке сүйікті ақынымен емірене қауышып, қимай қоштасқандай зор әсерге бөленді.

Еркеназ ҚАЛИЖАН

Суреттерді түсірген Ерлан АЛТЫБАЕВ