Атырау музейінің қоры сирек кездесетін фотоальбоммен толықты

Атырау облыстық тарихи-өлкетану музейінде «XIX–XX ғасырлардағы Атырау тарихы фотосуреттерде» атты бірегей фотоальбомның таныстырылымы өтті. Үш тілде жарық көрген басылымда бұрын-соңды жарияланбаған 289 тарихи фотосурет қамтылған.
Суреттер Атырау музейінің қорынан, Ресей ғылым академиясының мұрағаттарынан және Ресейдің мемлекеттік кинофотоқұжаттар мұрағатынан алынған. Фотоальбом «Елді мекендер», «Материалдық мәдениет», «Өнеркәсіп», «Шаруашылық және кәсіптер» атты төрт бөлімге бөлінген.

Шарада құттықтау сөз сөйлеген мәдениет басқармасының басшысы А. Жоламанов, өлкетанушы Н.Ақназаров және ардагерлер кеңесінің өкілі И.Балмағамбетов тарихи құндылықтарды сақтаудың маңызын атап өтті. Сонымен қатар тарихшы ғалымдар мен этномәдени бірлестіктердің өкілдері де өз пікірлерін білдірді.

Музей директоры М.Кипиев жобаның маңызын айта келе, бұл альбомның Атырау өңірінің тарихын тереңірек тануға зор мүмкіндік беретінін жеткізді. Іс-шара соңында жаңа басылымның лентасы салтанатты түрде қиылды.

Еркеназ ҚАЛИЖАН