Бейбарыс даңғылы мен Атырау-Астрахан трассасын байланыстыратын жолдың құрылысы басталады
Атырау облысының Өңірлік коммуникациялар қызметінде өткен баспасөз брифингінде қалалық жолаушылар көлігі және автомобиль жолдары бөлімінің басшысы Еркебұлан Аққұсов 2025 жылы істелетін жол салу және жөндеу жұмысы туралы айтты.
–Облыс және қала әкімдері халықпен кездескен кезде тұрғындар жол салынбай қалған көшелер туралы жиі айтады. Осыны ескеріп қала аумағында және ауылдық округтерде жол салынбай қалған учаскелерді анықтап, жобалық сметалық құжат жасап жатырмыз. Бұл жұмыс аясында 161 көше қамтылып, 66,8 шақырым жол салынады. Құрылыс жұмыстары «Самал», «Өркен», «Атырау», «Береке» ықшам аудандарында және Еркінқала, Алмалы, Қайыршақты, Дамбы ауылдық округтерінде жүзеге асады. Жобалау жұмыстарымен «Улмад» ЖШС айналысуда, — деді Е.Аққұсов.
Сонымен қатар, осы жылы Бейбарыс даңғылынан Атырау-Астрахан трассасына дейінгі 2,8 шақырымдық жаңа жолдың құрылысы басталады. Бұл жобаға «МКДСМ» ЖШС жауапты. Бөлім басшысының айтуынша, қала ішіндегі жолдарды қайта жаңғырту жұмысы да істеледі. Ұзындығы 3,4 шақырым болатын Қаныш Сәтбаев атындағы даңғыл мен Атырау-Астрахан тас жолының қалаға қарасты 6,4 шақырымы, яғни И.Тайманов көшесіндегі айналма жолдан Сарыөзек көпіріне дейінгі бөлігін қайта жаңғырту жұмысы осы жылы басталады. Қос жоба кезең кезеңімен іске аспақ.
Сонымен бірге Т.Бигелдинов, Ю.Гагарин көшелері, Жастар көшесі-Еркінқала ауылының аралығы, Әбілқайыр хан даңғылынан Сарықамыс шағынауданы мен Жастар көшесіне дейінгі аралықтағы автокөлік жолдарын қайта жаңғырту бойынша қолға алынған жұмыс жалғасады. 2024 жыл қорытындысымен 8,7 км тас жол қайта жаңғыртылды. Жоғарыда аталған көшелердің қалған 13,4 км бөлігі осы жылы аяқталатын болады.
Ал орташа жөндеу жұмысы Азаттық, Махамбет Өтемісов, Әлия Молдағұлова, Қабдрахман Ерниязов және Бинеш Жарбосынов көшесінде болады. Бұл іске «ДостықСпецТранс» және «ҚазСервисГрупп» ЖШС мердігер.
–Сонымен қатар Әбілқайыр хан даңғылы мен Абай көшесінде алты шақырым жолды жөндеу үшін ашық конкурс жарияланды. Алдағы уақытта жалпы ұзындығы 18,3 шақырым болатын 12 учаске мен 3 учаскені орташа жөндеуден өткізуді жоспарланып отырмыз. Қазір техникалық құжаттар дайындалып жатыр. Айта кетейік, қалалық әкімдік қала жолдарында пайда болған шұңқырларды бітеу жұмыстарын бастап кетті. Бұл жұмыстың көлемі 50 мың шаршы метрді құрайды, — деді Е.Аққұсов.
2022 жылдан басталған 200-ге жуық көшені қамтитын 186,3 шақырымдық жаяу жүргіншілер жолының құрылысы биыл толық аяқталмақ. Қазір бұл жұмыстың 30 пайызы істелген. Жол қауіпсіздігін арттыру мақсатында қала бойынша 2 200 жол белгісін орнату жоспарланып отыр.
