“Таза Қазақстан”: Атырауда кең ауқымды сенбілік өтті

„Наурызнама“ онкүндігі бағдарламасында белгіленген „Тазару күні“ шеңберінде және „Таза Қазақстан“ жалпыұлттық тазалық акциясы аясында Атырауда да тазалық жұмыстары жалғасын тапты. Оны облыстық табиғи ресурстар және табиғат пайдалануды реттеу басқармасы ұйымдастырды.

Ведомствоның баспасөз қызметінің мәліметінше, шараға шаһар тұрғындары, қаладағы бірқатар кәсіпорын-мекеме қызметкерлері, мемлекеттік қызметшілер, қоғам белсенділері мен ерікті жастар, оннан астам техника қатысты. Олар Жайық өзенінің жағалауында, сондай-ақ жекелеген шағын аудандарда тазалық жұмыстарын жүргізді. Нәтижесінде, барлығы 20 тонна қоқыс жинақталып, далаға шығарылды. Жалпы сенбілікке тартылғандардың саны 1500-ден астам адамды қамтыды.

— Қоршаған ортаның тазалығын сақтау және халықтың экологиялық мәдениеті мен сауаттылығын арттыру мақсатын көздейтін мұндай шаралар бір күнмен шектеліп қалмай, тұрақты үрдіске айналып келеді, — дейді мамандар.

Дәулетқали АРУЕВ