Аталған құжаттың негізінде, «Қазақстандық стандарттау және сертификаттау институты» республикалық мемлекеттік кәсіпорнының мамандары кеден аймағына шығарылатын буып-түйілген тауарлардың еркін тасымалданып, орын алмастыруын қамтамасыз ететін немесе реттеп отыруға мүмкіндік беретін техникалық регламенттің жаңа түрін жасақтаған. Жақында облыстық әкімдікте осы құжаттың таныстырылымына орайластырылған «дөңгелек үстел» ұйымдастырылды. Шараны ҚР Инвестициялар және даму министрлігі техникалық реттеу және метрология комитетінің Атырау облысы бойынша департаментінің басшысы Дияс Жәнібеков кіріспе сөзбен ашып, жүргізіп отырды.
Жаңадан қолданысқа енгізілмекші «Буып-түюдің қауіпсіздігі туралы» техникалық регламенті жайында оның жобасын дайындаған «Қазақстандық стандарттау және сертификаттау институты» РМК Атырау филиалының директоры Надежда Дю баяндады. Әріптесінің айтқандарын облыстық техникалық реттеу және метрология департаментінің бас маманы Алмагүл Ерболатова толықтырды.
Қазақстан Республикасында каталогтандыру жүйесін құру және шығарылатын өнімді тіркеуге байланысты бекітілген техникалық регламентке қатысты әңгімені институт филиалының жетекші маманы Асыл Ақбасова өрбітті.
«Дөңгелек үстел» басындағы дидарласуға қатысқан мемлекеттік атқарушы органдардың, салалық құрылымдардың және бизнес субъектілерінің өкілдері баяндалған тақырыптарды мұқият тыңдап, өзара пікір алмасты. Қойылған сауалдарға жауаптар қайтарылды.
Дәулетқали ЛАТИФҰЛЫ.
