Тариф және төлем: коммуналдық саладағы түйінді тарқата ма?

  Atr.kz/26-ақпан, 2019 жыл. Тариф арзандады. Бұл, әрине, халыққа тиімді.

Ал, енді қызмет сапасы қалай болмақ? Бұған дейін инвестициялық бағдарлама нәтижесінде тындырылған қыруар шаруа тағы шатқаяқтап кетпей ме? Анау жөнделген жүздеген шақырым жаңа тұрбалар уақыт өте тозады емес пе? Немесе аяқталмай қалған жобаларға қаражат қайдан алынбақ? Енді алға осындай сауалдар тартылады.

Сөз жоқ, әрбір жаңа объект іске қосылған соң оны ұстап тұратын шығын да есептеледі. Оған жұмысшылардың жалақысы да, техникаға қажетті жанармай да, қосалқы бөлшектер бағасы да қосылады. Ақырында, биылдан бастап республикадағы барлық кәсіпорын, соның ішінде коммуналдық қызмет көрсететін мекемелер де бар, еңбекақыны көтеруі тиіс. Мұның бәріне ішкі резерв жетер ме екен?

Жалпы, Мемлекет басшысы тариф саясатын қозғағанда оны есепсіз арзандатуды ұсынған жоқ. Ашықтығы мен қолжетімділігін қамтамасыз етуді, бұл бағыттағы тәртіпті ретке келтіруді тапсырды. Сайып келгенде, барлық монополиялық мекеменің биылға белгілеген жөндеу жұмыстары, кәсіпорынды жабдықтау шаралары бар-ды. Подстансаларды ауыстыру немесе желілерді жаңарту жоспары қарастырылған. Енді солардың денін кейінге қалдыруға тура келеді. Ал, содан соң қызмет көрсету сапасы сынға сай бола ма? Міне, монополияға қарсы орган осы жайды да таразылауы тиіс.

Қызмет көрсету ақысын арзандату пәтер иелері кооперативтеріне де қатысты. Қазір бұл құрылымды түбірімен қайта құру қажеттігі айтылып жатқанымен, олар әзірге жұмысын жалғастыруда. Онсыз да басқа тартса аяққа жетпейтін қысқа көрпемен күн кешіп отырғандар одан әрі белін бекем буа түспек. Шашылған қоқыс, жиналмаған дәліз – ертеңгі күннің көрінісі болмасын. Әсіресе, лифт шаруашылығын қалпына келтіру осы құрылымға да қатысты десек, оның түйіні қалай тарқатылар екен? Атыраудағы көп қабатты үйлерде орын алып жүрген жеделсатыға байланысты тосын жайлар да тұрғындарды толғандырады.

Меңдібай СҮМЕСІНОВ.

(Толық нұсқасы «Атырау» газетінің №15 санында)