Табиғи байлық — тұрақты табыс көзі
Жайық-Каспий облысаралық бассейндік балық шаруашылығы инспекциясында кезекті күзгі кәсіпшілік балық аулау маусымының басталуына байланысты негізгі мәселелер талқыланған жиын өтті.
Басқосуға аталған инспекцияның бөлім басшылары мен мамандары, облыстық табиғи ресурстар және табиғат пайдалануды реттеу басқармасы, «Балық шаруашылығы ғылыми-өндірістік орталығы» ЖШС-нің Атырау филиалы және балық шаруашылығы субъектілерінің жетекшілері қатысты.
Жиында 2024 жылдың 1 шілдесінен 2025 жылдың 1 шілдесіне дейінгі аралықта балық ресурстарын және басқа да су жануарларын аулауға бөлінген квотаны игеру бойынша жоспарлы жұмыс жүргізілгені айтылды. Осылайша, аталған мерзім ішінде рұқсат етілген балық пен су жануарларын аулау жоспарын толық орындау міндеті қойылып отыр.
Күзгі маусымға дайындық туралы сөз қозғаған Жайық-Каспий облысаралық бассейндік балық шаруашылығы инспекциясының басшысы Нұрлыбек Гайсин бұл бағыттағы нақты шаралар қолға алынуы тиіс екенін атап өтті.
Оның айтуынша, науқанға қатысатын балық шаруашылығы субъектілері бірінші кезекте балық аулау учаскелерінде бекітілген аншлагтарды, ақпараттық тақтайшаларды, ескерту белгілерін, трансферттерді және маңдайшаларды орнатуы тиіс. Бұл талап орындалмаған жағдайда оларды жаңарту қажеттігі, тазалық жұмыстары мен әрбір учаскеде қорықшы (егерь) болуы керектігі ескертілді.
Сондай-ақ, инспекторлар кәсіпшілік маусым басталғанға дейін балықшыларға заңнама талаптарын түсіндіру жұмыстарын жүргізуге міндетті. Ал шаруашылық субъектілері тек өздеріне тиесілі учаскелерде ғана балық қабылдауы тиіс.
– Сонымен қатар, «Жануарлар дүниесін қорғау, өсімін молайту және пайдалану туралы» ҚР Заңының 7-бабына сәйкес, ауланған, сатылған, сатып алынған және жасанды түрде өсірілген балық туралы ақпаратты жинақтап, өңдеу үшін «Балықтар мен басқа да су жануарларының мониторингісі» ақпараттық жүйесі (www.efish.kz) қолданысқа енгізілуде. Осыған байланысты инспекция және балық шаруашылығы субъектілері қызметкерлерін оқыту 2025 жылдың 13 қыркүйегі мен 11 қазаны аралығында ZOOM платформасы арқылы жүргізіледі, – деді инспекция басшысы.
Дәулетқали АРУЕВ
