Өңірлік экономика: егін алқабы кеңейіп, техника жаңартылды
Бұған дейін де хабарлағанымыздай, биыл облыстағы егістік алқаптың көлемі 9 300 гектардан асып, былтырғы көрсеткіштен 4 000 гектарға артық болып отыр. Күздегі мол өнімнің негізі қаланатын көктемгі дала жұмыстары белгіленген мерзімде, агротехникалық талаптарға сай атқарылуының арқасында, қазіргі уақытта өңірде бітік шыққан егістік дақылдарын ысырапсыз жинап алу жұмыстары қарқын алған.
Ауыл шаруашылығы және жер қатынастары басқармасының бөлім басшысы Азат Қапановтың айтуынша, бүгінгі күні облыс бойынша өсірілген егіндіктің 4 100 гектарында, яғни тең жартысына жуық бөлігінде жиын-терім жұмыстары аяқталған. Одан жалпы көлемі 76 000 тонна өнім алынған. Соның ішінде: көкөністен – 36 мың тонна, бақшадан – 25 мың тонна, картоптан – 4 мың тонна және малазықтық дақылдардан – 11 мың тонна өнім жиналған.
— Саланың материалдық-техникалық базасын нығайту мақсатында жыл сайын науқандық жұмыстарға тартылатын ауыл шаруашылығы техникаларының санын көбейтуге көңіл бөлінуде. Бүгінгі күні олардың саны 3 100-ге жуықтап отыр. Тек биылдың өзінде егіншілікпен айналысатын шаруашылықтардың қажетіне жаңадан 80-нен астам техника сатып алынды.
Осы жылғы егіншілікке байланысты жоспарланған шараларға барлығы 780 түрлі ауыл шаруашылығы техникасы тартылуда (оның ішінде 450 трактор, 330 агрегат, оған қоса су соратын құрылғылар).
Айрықша атап өтер жайт — жылдан жылға тиімділігі жоғары технологияларды өндіріске енгізу көлемі ұлғайып келеді және бұл тәжірибе өзінің өміршеңдігін дәлелдеуде.
Осылайша, 2025 жылы 4 300 гектар жер – тамшылатып, ал 3 100 гектарға жуық жер – жаңбырлатып суару тәсілімен күтіледі. Бұл тұтастай егіндіктің 82 пайызын қамтиды. Болашақта жалпы егістік алқабын ұлғайта отырып, тиімді технологиялар қолданылатын егінжайдың ауданын 9 600 гектарға жеткізу көзделіп отыр, – деді салалық басқарма өкілі.
Білгеніміздей, биыл шетелдік азаматтарды маусымдық жұмысқа тарту үшін облыс бойынша 670 квота бөлінді.
Күзгі егін жинау науқанына жеңілдетілген дизель отынына 23 шаруа қожалығынан 188 тонна көлемінде сұраныс түскен.
Егін шаруашылығындағы 5 бюджеттік субсидиялау бағдарламасына жергілікті бюджеттен 465,3 млн теңге көлемінде қайтарымсыз қаржы бағытталды.
Атап айтқанда, су жеткізу қызметі шығындарының орнын толтыруға – 345,6 млн. теңге (85%-65%). Тыңайтқыштардың құнын субсидиялауға – 75,121 млн. теңге (60%-50%). Пестицидтердің құнын өтеуге – 5,4 млн. теңге (50%). Тұқым шаруашылығын дамытуға – 19,9 млн теңге (50%-30%). Басымдық берілген дақылдарды субсидиялауға – 19,3 млн. теңге (20%-22%).
Дәулетқали АРУЕВ
