Атыраудағы зауытта резервуарлар жаңғыртылуда
Атырау мұнай өңдеу зауытында мұнай және мұнай өнімдеріне арналған резервуарларды экологиялық жаңғырту жұмыстары жалғасып жатыр. Бұл бастама — кәсіпорынның ұзақмерзімді экологиялық бағдарламасының маңызды бөлігі саналады.
Kmg.kz. ақпараттық ресурсының хабарлауынша, зауыт резервуарлары арнайы қалқымалы понтондармен жабдықталып жатыр. Бұл құрылымдар Нидерландының Maxwell Continental Tank Serv Engineering B.V. компаниясы тарапынан арнайы АМӨЗ үшін дайындалған. Алюминийден жасалған понтондар — жеңіл, коррозияға төзімді, өрт қауіпсіздігі жоғары және оңай орнатылады.
Жаңғырту аясында барлығы 75 резервуарға понтон орнату көзделген. 2018 жылы 51 резервуар жабдықталса, 2022–2023 жылдары — 7, 2025 жылдың тамызында тағы 2 резервуарға понтон орнатылды. Сонымен қатар 2026 жылдың соңына дейін қосымша 11 резервуар жаңғыртылмақ.
Бағдарламаның соңғы кезеңінде қалған 4 резервуар қамтылады.
Понтондар көмірсутек буларын 90%-ға дейін азайтуға мүмкіндік береді. Жаңғырту шараларының нәтижесінде 2025 жылдың алғашқы жартыжылдығында атмосфераға эмиссия көлемі 5 340 тоннаны құрап, былтырғы осы кезеңмен салыстырғанда 17 тоннаға төмендеген.
Айта кету керек, понтондар — резервуар ішіндегі сұйықтықтың бетіне орналастырылатын қалқымалы ішкі құрылымдар. Олар булануды болдырмайды, мұнай өнімдерінің сапасын сақтайды, шығынды азайтады, өрт пен жарылыс қаупін төмендетеді. Ең бастысы — қоршаған ортаға әсерді едәуір азайтады.
Алтыншаш ҚҰРМАШЕВА
