Atyrau Oil&Gas халықаралық көрмесі: мұнай-газ химиясы саласына кадр даярлау
Жыл сайынғы Atyrau Oil & Gas халықаралық көрмесі аясында Атырау облысының мұнай-газ химиясы саласын дамытудағы негізгі мәселелер талқыланған пленарлық отырыс өтті. С.Өтебаев атындағы Атырау мұнай және газ университетінің ректоры Гүлзада Шакуликова өңірлік индустриялық университеттің мұнай-газ химиясы үшін жоғары білікті кадрларды даярлауда жетекші күшке айналып, жергілікті колледждермен табысты жұмыс істеп жатқанын атап өтті.
Ректор оқу орнында жаңа білім беру бағдарламаларының іске қосылып жатқанын атап өтті. Университет базасындағы Губкин атындағы РМУ филиалы Теңіздегі KMG PetroChem газды бөлу кешені үшін мұнай-газ технологиялары бойынша кәсіби курстар ашты.
Сибур бағдарламасы аясында Уфа мемлекеттік мұнай техникалық университетімен бірлесіп, KPI қызметкерлеріне арналған мұнай-газ химиясы және полимерлік технологиялар бойынша қос дипломды бағдарламалар іске қосылды.
Сонымен қатар, полимерлік технологиялар бойынша жаңа бағдарламалар “Силлено” ЖШС және “Бутадиен” ЖШС компанияларымен серіктестікте әзірленді.
Университет жетекші мұнай-газ химиясы компанияларымен консорциум құрды. Консорциум шетелдік лицензиаттармен, атап айтқанда Técnicas Reunidas компаниясымен серіктестікті дамытуға бағытталған. Бұл бастама студенттерді шетелдік лицензиат базасында қайта даярлауға және озық технологияларды енгізуге мүмкіндік береді.
Көрме аясында мектеп оқушыларымен бірлескен іс-шаралар ұйымдастырылып, химия ғылымын насихаттау жұмыстары жүргізілді. Сондай-ақ, болашақ мамандарды салаға тарту мақсатында жұмысшы мамандықтар жәрмеңкесі өтті.
Бұл бастамалар мұнай-газ химиясы саласында кадрлық әлеуетті дамытып қана қоймай, инновацияларды, инвестицияларды және Атырау облысының тұрақты дамуын ынталандыруға ықпал етеді.
