«Atyrau Oil&Gas-2025»:ашық диалог алаңы

Admin03.04.2025 02:27

Бүгін Атырауда жыл сайын дәстүрлі түрде өтетін «Atyrau Oil&Gas» көрмесі басталды. Тұрақты серіктес пен жаңа тұтынушы арасына диалог алаңына айналған маңызды шараға биыл Австрия, Германия, Италия, Қазақстан, Қытай, Нидерланды, БАӘ, Пәкістан, Ресей секілді он шақты елден 97 компания қатысып отыр. Бұл жолы көрмеге италияндық 18 кәсіпорын өнімдерін шығаруға ниет білдірген. Мұнай және газ саласында айшықты орын алатын компаниялар тауарларын ұсынған көрмені облыс әкімінің орынбасары Дарын Шамұратов аралап, кәсіпорын өкілдерімен тілдесті.

Шараға тұңғыш рет қатысқандар арасында ARCONMET, Beruseal Caspian, Caspian Resources & Technical Services, IEC ENERGY GmbH, PCA POWER KZ, SDM Lifting, Izoplus Central Asia, Makita, Svarka KZ, Novateq Group, ARS Oilum / OSS Kazakhstan, Save the Caspian Sea, Flow Tech Corporation, Akvatoriya Aktobe, Caspian Resources & Technical Services, Caspian Radio Services және тағы да басқа да компаниялар бар.

Ал осындай көрмелерге тұрақты түрде қатысып жүрген «Texol» ЖШС директорлар кеңесінің төрағасы Шота Абхазаваның айтуынша, бұл көрме серіктес пен тұтынушы арасындағы ашық диалог алаңы іспеттес. Аталған кәсіпорын қызметіне озық технологияларды енгізе отырып, роботтарды қолдана бастаған. Яғни, резервуарларды мұнай шламдарынан робот-машиналар тазалайды. «Ұйымдастырушыларға мұнай сервистік компаниялары арасында байланыс орнатуға үлкен мүмкіндік туғызғаны үшін алғыс айтамын. Біздің компания «қара алтын» сақтайтын резервуарларды қалдықтардан терең тазалап, сервистік қызмет көрсетеді. Нақтырақ айтсақ, қауіпсіздік талаптарына сай адами фактордың қатысуынсыз роботтар жұмыс істейді. Әсіресе, жабық алаңдарда, жарылғыш қаупі бар аймақтарда бұл таптырмас қызмет түрі деп есептеймін. Роботтар ауыр жұмыстарды тәулік бойы қызмет етеді. Оператор қауіпсіз жерде осы роботты басқарады»,-дейді Шота Абхазава.

«Atyrau Oil&Gas» көрмесі жаңа технологияларды енгізу, капитал тарту және халықаралық әріптестікті дамыту үшін тиімді платформа ұсынған. Ол стратегиялық бастамаларды іске асыруға ықпал етіп, саланың ұзақ мерзімді дамуын қамтамасыз етеді, сондай-ақ технологиялық жаңғыру мен инновацияларды ынталандырады. Италия елшілігі сауда бөлімінің өкілі Мартино Кастеланидің айтуынша, бұл жолы шараға 17 италияндық кәсіпорын өз тауарларын ұсынды. «Көрмеде негізінен мұнай және газ өндірісімен тығыз байланысты компаниялар қатысып отыр. Қазақстанда өндіріс ошағы көптеп болғандықтан, бұл мемлекетке қызығушылығымыз жоғары. 1960 жылдары ашылған ENI компаниясы осы аймақта отыз жылдан астам уақыт бойы жұмыс істеп келеді. Басқа кәсіпорындар да тығыз байланыс орантса деген ниетпен келдік»,-дейі Мартино Кастелани.

Көрме аясында «Мұнай-газ химиясындағы жаңа жобалардың перспективалары мен сын-қатерлері»тақырыбында пленарлық отырыс өткзілді. Бұл сессияда елімізде мұнай-газ химиясын дамыту стратегиялары, инвестицияларды ынталандыру бағдарламалары және экологиялық тұрақты даму мәселелері талқыланды. Ал «Мұнай-газ саласында цифрлық шешімдерді енгізудің болашақ перспективалары» атты панельдік сессияда үлкен деректерді пайдалану, автоматтандыру, жасанды интеллект және олардың өндірістік процестерге ықпалы мәселелері қарастырылды.