Жылыойлық оқушылар әлемдік чемпионаттан жүлделі оралды

Жылыойлық оқушылар Үндістанда өткен бүкіл әлемдік «The Goa International Robotics Competition» чемпионатында «Team model» номинациясын жеңіп алды, деп хабарлайды atr.kz тілшісі Жылыой ауданы әкімдігінің баспасөз қызметіне сілтеме жасап.

Жетпіс оқушыдан құралған алты қазақстандық команда Үндістанға робототехника чемпионатына қатысты. Олардың ішінде жылыойлық оқушылардан құралған «Jylyoi tehnik» командасы да бар.

Олар әр елден барлығы 220 команда қатысқан The Goa International Robotics Festival ашық чемпионатында бақ сынасты.

-Бұдан бұрын жылыойлық оқушылардан құралған «Jylyoi tehnik» командасы 11-12 желтоқсанда Алматы қаласында өткен «Almaty Tech Cup — 2023» кезеңінен топ жарып, Үндістанда өтетін бүкіл әлемдік «The Goa International Robotics Competition» жарысына жолдама алған болатын. Елімізде өткен чемпионатқа барлық өңірден 6-22 жас аралығындағы 2500-ден астам оқушылар мен студенттер қатысқан. Оның ішінде ауыл мектептерінің оқушылары да бар. Жас өнертапқыштар роботтар мен дрондармен ойынында жарысып қана қоймай, «өнердегі ғылыми инновациялар» тақырыбында өздерінің инновациялық жобаларын ұсынған еді,- деді «Jylyoi tehnik» командасының жетекшісі Қуаныш Шалабаев.

Оның айтуынша, жалпы команда құрамында төрт оқушы болса, алайда осы жолы Үндістанға екі оқушы барған. Олар Даулет Жақия мен Әлихан Көшім. Оқушылар өз еңбектерін көрсетіп, «Team model» номинациясы бойынша командалық кубок пен сертификаттарға ие болып отыр.

Айта кетейік, аталған чемпионатқа Алматы, Астана, Екібастұз, Құлсары қаласының командалары қатысқан.