Жаңа оқу жылы жаңа міндеттермен басталады
Әр жыл сайын дәстүрлі түрде тамыз айында өткізілетін педагогтердің облыстық конференциясы білім саласының дамуына жаңа серпін береді. Бұл жылы «Білім келешегі: адал азамат, кәсіби маман» тақырыбында өткен ауқымды шара педагогтер, басқарма басшылары, әдіскерлер, білім беру ұйымдарының басшылары және сала ардагерлерін бір арнаға тоғыстырды.
Конференция Қазақстан Республикасының Мемлекеттік гимнімен басталып, LED экран арқылы мемлекет басшысы Қасым-Жомарт Тоқаевтың білім саласындағы бастамалары туралы бейнематериал көрсетілді.
Ресми бөлімде облыстық білім басқармасыныңбасшысы Марат Әбуов жаңа оқу жылының басым бағыттары мен өңірде атқарылған ірі жобаларды баяндады. Сөз кезегі Қазақстан Республикасы Оқу-ағарту министрлігі Орта білім беру комитетінің төрағасы Қаныбек Жұмашевқа беріліп, ол өз баяндамасында еліміздің орта білім жүйесін дамытудағы жаңашылдықтар мен алдағы міндеттерге тоқталды.
Пленарлық отырыста Келешек мектеп директоры Амангүл Баймұханова, Астана қаласының Бином Сәтпаев School мектебінің директоры Құралай Байтажикова, «Өрлеу» біліктілікті арттыру ұлттық орталығының Атырау филиалы директоры Маржан Ғалымжанова және Атырау политехникалық жоғары колледжінің директоры Бақыт Шеркешбаева сөз сөйледі. Әр спикер өз тақырыбы бойынша мектептерде қолданылып жатқан заманауи әдістер, цифрлық шешімдер мен кәсіби білім беру үрдістері туралы ой-пікірлерімен бөлісті.
Конференция барысында облыс әкімі Серік Шәпкенов ұстаздардың еңбегін жоғары бағалап, білім саласында жүзеге асырылған жобалардың нәтижелі болғанын атап өтті. Ол білім алушылар мен мұғалімдерге қолайлы жағдай жасау бағытындағы жұмыстарға тоқталып, жаңа оқу жылына дейін 3 Келешек мектебі мен 2 балабақшаның пайдалануға берілетінін, сондай-ақ 11 мектептің құрылысы жүргізіліп жатқанын айтты. Сонымен қатар, апатты және үш ауысымды мектептердің мәселесін шешу, материалдық-техникалық базаны жаңарту және жасанды интеллектіні мектептерге енгізу бойынша нақты тапсырмалар берді.
Облыс әкімінің айтуынша, білім саласындағы ең басты басымдық – тәрбие мәселесі. «Адал азамат» бағдарламасы аясында балалардың қауіпсіздігі мен сапалы білім алуын қамтамасыз ету маңызды. Білім беру ұйымдары 100%-ға бейнекамералар мен дабыл батырмасымен қамтылып, интернетпен толық қамтамасыз етіледі.
Конференция марапаттау рәсімімен жалғасып, үздік педагогтер мен білім саласының белсенділері арнайы наградалармен марапатталды. Кеш соңында қатысушылар концерттік бағдарлама арқылы мерекелік көңіл-күйге бөленді.
Еркеназ ҚАЛИЖАН
Суреттерді түсірген Ерлан АЛТЫБАЕВ
