Ұлт болашағына салынған инвестиция
«Жайлы мектеп» ұлттық жобасы – Қазақстанның білім беру саласында жүзеге асып жатқан ең ауқымды әрі жүйелі бастамалардың бірі. Бұл жоба тек жаңа мектеп ғимараттарын салумен шектелмейді, ол – білім беру ортасын түбегейлі өзгертіп, оқушылар мен мұғалімдерге қолайлы, заманауи талаптарға сай жағдай жасауды мақсат етеді.
Жаңа мектептер типтік жобалардан 15-20%-ға кең, ал техникалық жарақтандырылуы 4 есеге дейін артық болуы – білім беру процесінің тиімділігін арттырады.
Бүгінгі мектеп тек білім беретін мекеме ғана емес, ол – баланың тұлға болып қалыптасуына ықпал ететін орта. Заманауи эргономикалық жиһаз, интерактивті құралдар, қауіпсіздік жүйелерінің орнатылуы – баланың жан-жақты дамуына және сапалы білім алуына жағдай жасайды. Бұрын бұл мүмкіндіктер тек қалалық элиталық мектептерде ғана болса, енді елдің түкпір-түкпіріндегі оқушылар үшін де қолжетімді болып отыр. Бұл – білім беру саласындағы теңсіздікті жоюға бағытталған өте дұрыс қадам.
Аталған жобаның ауылдық жерлерге де басымдық беруі ерекше назар аударуға тұрарлық.
Жобаның жартысына жуығы ауылдық елді мекендерде жүзеге асып жатқаны – өте құптарлық жағдай. Өйткені сапалы білім – тек қаланың ғана емес, әрбір қазақстандық баланың құқығы. Ауыл балаларына заманауи білім беру ортасын қалыптастыру – олардың болашақта үлкен мүмкіндіктерге ие болуына жол ашады.
Сонымен қатар жобаның ішкі нарықты дамытуға қосып жатқан үлесі зор. Ұлттық жобаның отандық өндірушілерге басымдық беруі – стратегиялық тұрғыдан өте маңызды шешім. Мектептерге қажетті құрылыс материалдары мен жиһаздардың жергілікті компаниялардан сатып алынуы – еліміздің экономикасын қолдауға, жұмыс орындарын сақтауға және отандық кәсіпорындардың бәсекеге қабілеттілігін арттыруға өз септігін тигізеді. Бұл – білім мен өндіріс арасындағы байланысты нығайтатын дұрыс бағыт.
Жалпы, бұл жоба – тек мектеп салу емес, ол – ұлт болашағына жасалып жатқан инвестиция. Сондықтан мұндай бастамалардың жүзеге асырылуы – мемлекетіміздің стратегиялық даму бағытының жарқын көрінісі.
Саламат ИДРИСОВ,
Х.Досмұхамедов атындағы Атырау университетінің ректоры,
облыстық мәслихаттың депутаты
Сурет: gov.kz
