Ұлт болашағы — білім мен жауапкершілікте
Біз – Қазақ елінің қайта жаңғыру дәуірінде өмір сүріп жатқан ұрпақпыз. Бұл – зор мәртебе ғана емес, кемел келешекке жол бастайтын үлкен міндет. Себебі қазіргі қоғамның, әсіресе білім беру саласының алдында тұрған мақсат – ел ертеңін қолға алатын ұрпақты тәрбиелеу.
Бүгінгі мектеп оқушысы – ертеңгі заң шығарушы, дәрігер, инженер, ғалым немесе ел басқаратын азамат. Сондықтан Президентіміз айтқан: «Балаларымыз бен немерелерімізге дамыған, өркениетті, құқықтық ел қалдыруымыз қажет» деген сөзі – әрбір мұғалім үшін бағдаршам болуы тиіс. Бұл біздің кәсіби борышымызбен қатар – ұлт алдындағы перзенттік парызымыз.
Президентіміз «Әділетті, Қауіпсіз, Таза және Қуатты Қазақстан» құруды ұлттық идеология ретінде айқындады. Бұл – жай ұран емес, терең мәні бар тұжырымдама. Себебі осы төрт ұғым елдің ішкі мәдениетін, рухани тазалығын, құқықтық тәртібін және экономикалық қуатын сипаттайды. Ал осы бағыттарда тұрақты даму үшін білім саласы шешуші рөл атқарады.
Бүгінде мектеп қабырғасында оқып жатқан әр бала – осы жаңа дәуірдің белсенді қатысушысы. Сондықтан біз оларды тек біліммен ғана емес, қоғам алдындағы жауапкершілікпен, елге деген сүйіспеншілікпен, әділет пен парасаттылыққа негізделген ұстаныммен тәрбиелеуіміз қажет.
Президентіміз Конституцияның әр бабын мүлтіксіз орындау – әр азаматтың міндеті екенін атап өтті. Біз бұл қағиданы мектеп мәдениетіне де енгізуіміз керек. Оқушылардың құқықтық сауаттылығы, заңға деген құрметі, адалдық пен әділеттілікке негізделген көзқарасы – келешектегі әділетті қоғамның кепілі.
Бүгінгі әлем тұрақсыздық пен ақпарат тасқыны кезеңін бастан кешіп жатыр. Осындай сындарлы сәтте ұлтты біріктіретін, ұрпақты бағыттайтын басты күш – білім мен тәрбие. Біз осы салада қызмет етіп жүрген жандар ретінде бұл жауапкершілікті терең түсінеміз.
Бүгінгі ұрпақ – болашақ тарихтың авторы. Ал сол тарихтың бағыт-бағдарын бүгін берілген білім мен тәрбие айқындайды. Ұстаздар – сол тарихи бағытты қалыптастыратын алғашқы көшбасшылар.
Жоламан ІЗҒАЛИ,
Ақтоғай орта мектебінің директоры
Махамбет ауданы
