Жас ұрпақты білім нәрімен сусындатып, оларды тәрбиелеу ісіне бар күш—жігері мен білімін сарқа жұмсап жүрген ұстаздар аз емес. Олардың қатарында Каспий өңірінің қазіргі заманғы жоғары колледжінің директордың оқу—өндірістік тәжірибе жөніндегі орынбасары Айнагүл Ахметова да бар.
Ұстазға тән бар асыл қасиетті бойға жиған Айнагүл Мақсотқызы кеше Ақтөбе қаласында Халықаралық Педагогика және инновациялық технологиялар ғылым академиясының ұйымдастыруымен өткен шарада «Асыл ұстаз» төсбелгісімен марапатталды. Шәкірттерді азаматтық парасаты биік, рухани адамгершілік ұстанымы берік тұлға ретінде қалыптастыруда өз қолтаңбасын қалдырып, ұжым мәртебесін көтеруге қарқынды үлес қосқаны үшін осынау марапат иесі атанған парасатты педагогтың бұған дейінгі жетістіктері де аз емес. Ол 2014 оқу жылының облыстық «Үздік оқытушы» байқауынан бас жүлде, республикалық «Үздік оқытушы – 2014» байқауында үшінші орынды қанжығаға байлады. биыл «Үздік педагог» байқауының жеңімпазы атанды.
«Ұстаз шәкірттерге білім, тәлім-тәрбие берумен қатар, жақсы қасиеттерді бойларына дарытып, адамгершілік рухта бағыт-бағдар беруде аянбай еңбектенуі қажет. Сонда ғана маңдай тердің жемісі нәтижесін береді. Бұл жетістігім мені саналы ұрпақ алдындағы ұстаз бейнесін одан әрі жарқырата беруге жетелейді», – дейді Айнагүл Мақсотқызы.
Алтыншаш ҚҰРМАШЕВА
