Атыраулық оқушы — республикалық конкурс жеңімпазы

Мақат ауданындағы А.Құнанбаев атындағы орта мектебінің VII сынып оқушысы Кәусар Тілеген
республикалық «ProEco» экологиялық конкурсының жеңімпазы атанды. Кәусар конкурстың «Таза қала сізден басталады» атты бағыты бойынша жоба қорғап, ІІІ орынды жеңіп алды.

Облыстық білім беру басқармасының баспасөз хатшысы Эльмира Тұңғатарованың хабарлауынша, оқушының «Кәріз суының экологиялық мәселелері» тақырыбындағы жобасының мақсаты өңірде кәріз суының экологиялық мәселелерін болдырмау және алдын алу.

-Мақат ауданының және Доссор кентінің экологиялық ластану көзінің бірі — кәріз суы. Туған өлкеміздегі үйлерден, мекемелерден шығатын лас су көздерін төгетін арнайы орындардың болмауы экологиялық мәселе туғызып отыр. Бұл проблеманың өлкеміздің қоршаған табиғатына және тіршілік иелеріне тигізер кері әсері өте көп. Бұл жоба өңірдегі кәріз суының экологиялық мәселелерін болдырмауды және оның алдын алу мақсатында жасалды, — дейді Кәусар Тілеген.

Мәлике МӘЛІК