Атырауда өткен республикалық олимпиаданың облыстық кезеңі мәресіне жетті
Облыстық білім беру басқармасының «Таланттарды анықтау және қолдау» орталығының жылдық жоспарына сәйкес өткен жылдың 6-8 сәуір күндері 9-11 сынып оқушылары арасында жалпы білім беретін пәндер бойынша республикалық олимпиаданың облыстық кезеңі өткен еді. Абай атындағы оқушылар орталығында білім додасының қорытынды марапаттау шарасы ұйымдастырылды. Облыстық білім беру басқармасының басшысы Марат Әбуов жүзден жүйрік, мыңнан тұлпар атанғанжүлдегерлерді құттықтап, атыраулық оқушылардың жетістіктеріне тоқталды.
– Дарынды балаларға арналған олимпиаданы өткізу елімізде дәстүрге айналды. Соңғы жылдары республика бойынша олимпиада көрсеткіштері едәуір жақсарған. Бұл өңірдегі білім сапасының артып, ізденімпаз жастардың қатары толысқанының дәлелі. Мақтан тұтар оқушыларымыз республикалық, халықаралық зияткерлік олимпиадалардан 55 алтын, 112 күміс, 179 қола медальді иеленіп, 4 жыл қатарынан республикалық командалар арасында үздік үштіктер қатарынан көрінді. Оның ішінде Халықаралық олимпиадалардан 85 жүлдегеріміз бар. Олимпиаданың білім беру ісіндегі маңыздылығы бәріңізге белгілі. Осы додада тайсалмай бақ сынаудың өзі үлкен жеңіс. Сіздерді бүгінгі жетістіктеріңізбен құттықтай отырып, алар асуларыңыз биік, болашақтарыңыз жарқын болуына тілектеспін,-деді М.Әбуов.
Айта кетейік, олимпиаданың облыстық кезеңіне аудандық кезеңнің жеңімпазы атанған 701 оқушы қатысты. Қазылар алқасының шешімімен 277 оқушы жүлдегер атанды. III орынға 138 оқушы, II орынға 90 оқушы ие болса, I орынды 49 оқушы қанжығасына байлады.
Сондай-ақ, республикалық олимпиаданың үшінші кезеңінде үздік нәтиже көрсеткен облыстық білім беру ұйымдары анықталды. 11-сынып оқушыларының арасынан жүлдегер болғандарға Х.Досмұхамедов атындағы Атырау университетінің және С.Өтебаев атындағы Атырау мұнай және газ университетінің білім гранты табыс етілді.
Білім бәйгесінде оза шауып, жоғары нәтиже көрсеткен оқушылар наурыз айында өтетін республикалық олимпиадада облыстың атынан сынға түседі. Аталған басқарма республикалық олимпиадаға дайындау үшін оқу-жаттығу жиындарын өткізеді.
Еркеназ ҚАЛИЖАН
Суреттерді түсірген Ерлан АЛТЫБАЕВ
