Атырау университетіне шетелдік ғалым келді
Х.Досмұхамедов атындағы Атырау университетінің басқарма төрағасы-ректоры Саламат Идрисов Түркияның Измир қаласында орналасқан Эге университетінен келген профессор, доктор Сечкин Сарпкаяны қабылдады.
Кездесуде түркиялық профессорға оқу орынының негізгі бағыттары мен ғылым саласында атқарылып жатқан жұмыстар таныстырылды.
Орхун бағдарламасы аясында келген шетел ғалымы Атырау университетінде бір айға жуық уақыт дәрістер өткізіп, тәжірибесімен бөліседі. Сечкин Сарпкаяның ғылыми жұмысының негізгі бағыты түрік фольклорына негізделген. Негізінен Түркия, Әзербайжан және Иран ғалымдарымен – аңыз-әфсаналар, ертегілер, ойындар тақырыбын зерттеуде бірлесе жұмыс атқарған. Көптеген халықаралық конференциялар мен конгресстерде түрік және ағылшын тілдерінде баяндамалар жасаған оны ғылыми ортада жазушы ретінде де таниды.
Эге университетінде аударма ісі, көптілді білім беру бағыттары бойынша шетелден келген студенттерге түрік тілін үйретуді қолға алған. Академиялық ұтқырлық бағдарламасы аясында оқуға кеткен Атырау университетінің студенттері де Сечкин Сарпкаядан дәріс алған.
Шетел ғалымының өңірге сапарының басты бағыттарының бірі – студенттерге дәріс оқу, магистранттарға шеберлік сағаттарын өткізеді деп жоспарлануда.
