Ақжар ауылында 290 орындық балабақша ашылды

Елімізде 2-6 жас аралығындағы бүлдіршіндерді балабақшамен қамту міндеті тұр. Бүгін Қайыршақты ауылдық округіне қарасты «Ақжар-2» ауылында мемлекеттік-жекеменшік әріптестік арқылы жаңа балабақша пайдалануға беріліп, тұрғындарды қуантты.

Екі жыл бұрын құрылысы басталған «Ақжелкен» балабақшасы 290 орынға арналған. Оның ашылу салтанатына қатысқан облыс әкімі Серік Шәпкенов мемлекет тарапынан балалардың тиісті деңгейде тәрбие алып, сапалы білімге қол жеткізуіне жағдай жасалып келе жатқанын атап көрсетті.

– Бала болашағымыздың кепілі екені белгілі. Бала тәрбиесі бесіктен басталып, балабақшада жалғасын табатындықтан оның орны ерекше. Облыс көлемінде жоспар бойынша балабақшалар санын көбейтіп жатырмыз. Былтыр 1000-ға жуық орынға арналған балабақшаларды ашсақ, биыл 2600 орындық балабақшаларды ашып жатырмыз. Бұған дейін 3 балабақша пайдалануға берілсе, бүгін 3 балабақшаның тұсауын кесілгелі тұр. Жылдың соңына дейін тағы 3 балабақша пайдалануға беріледі, — деді облыс әкімі.

Серік Жамбылұлының айтуынша, алдағы бес жылда облыста барлығы 8 мың орындық бірнеше балабақша ашылады екен.

Балабақша директоры Анар Жантаеваның айтуынша, балабақшада 12 топ болса, олардың әрқайсысында 25 орын қамтылған.

– Балдырғандарды қаңтар айынан бастап қабылдаймыз. Мекемеде 39 маман жұмыс істейді, олардың 17-сі жоғары білімді жастар. Барлығы да ауыл тұрғындары, — деді Анар Мирболатқызы.

Балабақшаның тұсаукесу рәсімі ардагер-ұстаздар Сатқан Есенғалиев пен Злиха Дүйсекеноваға берілді.

Жалпы аумағы 4638 шаршы метрді алып жатқан қос қабатты ғимараттың құны – 1,3 миллиард теңге.

Алмас ҚАБДОЛОВ

суреттер автордікі