Агроном түсті сайысқа!
Мұнайлы өлкеде «жұмысшы мамандықтары жылы» аясында үздік агрономдар анықталды. Бүгін О.Көшеков атындағы Атырау аграрлы-техникалық колледжінде облыстық «Агрокөшбасшы-2025» байқауы ұйымдастырылды.
Байқаудың бағыты – өсімдік шаруашылығы құзыреттілігі. Шараға облыстың аграрлық-техникалық колледждерінің оқытушылары мен өндірістік оқыту шеберлері қатысты. Байқаудың ашылу салтанатында колледж директоры, профессор, т.ғ.д. Ислам Жанұзақов сөз сөйлеп, қатысушыларға табыс пен сәттілік тіледі.
Сондай-ақ, шара барысында өңірдің ауыл шаруашылығы саласындағы жетекші колледждері – Құрманғазы, Қызылқоға, Индер және Махамбет аграрлы-техникалық колледждері арасында ынтымақтастық туралы Меморандумға қол қойылды.
Байқау теориялық және практикалық кезеңдерден құралды. Теориялық бөлімде қатысушылар тест тапсырып, топырақтың ылғалдылығы мен pH деңгейін анықтап, ауыл шаруашылығын дамытуға бағытталған жаңа технологиялар мен бизнес-жобаларын қорғады. Ал практикалық бөлімде «Аяулым» шаруа қожалығының базасында ағаш отырғызу, ағашты күзгі кесу және күзгі улау жұмыстары ұйымдастырылды.
Сайыс нәтижесінде үздік қатысушылар анықталып, арнайы марапаттар табысталды. «Агрокөшбасшы – 2025» байқауы – педагогтер мен өндірістік оқыту шеберлерінің кәсіби шеберлігін шыңдап қана қоймай, агросаланың заманауи технологияларын насихаттап, жастардың жұмысшы мамандықтарына қызығушылығын арттыруға бағытталған маңызды шара болып отыр.
Айбөпе САБЫРОВА
Суреттерді түсірген Ерлан АЛТЫБАЕВ
