«Жаңа туған ай» кітабының тұсауы кесілді

Бүгін Атырау қаласында Салтанат сарайының мәжіліс залында аймақ руханияты үшін тағылымы мол маңызды шара – «Жаңа туған ай» атты ғұмырнамалық кітаптың тұсаукесері өтті.

Ізгі шараға зиялы қауым өкілдері, Ардагерлер кеңесінің мүшелері, мәдениет және өнер саласының майталмандары, әдебиетсүйер қауым мен жастар қатысты. Тұсаукесер Қазақстан Республикасы Мәдениет саласының үздігі Сайпеден Сидағалиевтің авторлығымен түсірілген «Тұғыр төріндегі тұлға» атты деректі фильмнің көрсетілімімен ашылды.

Модератор атап өткендей, бұл кітап Мемлекет басшысы Қасым-Жомарт Тоқаевтың бастамасымен жарияланған «Жұмысшы мамандықтардың жылы» аясында жарыққа шығып отыр. Президент өз сөзінде: «Адал әрі табанды еңбегімен табысқа жеткен адамдар қашанда құрметті, сыйлы болуы керек» деген болатын. Осы орайда, «Жаңа туған ай» еңбегі сол сөздің нақты көрінісіндей әсер қалдырды.

Жаңа кітап – еңбек майталманы, Атырау облысының Құрметті азаматы Жанай Берқалыұлының өмір жолына арналған. Трактор тізгінінен бастап ел құрметіне бөленген тұлғаның өнегелі ғұмыры көрермендерге ерекше әсер етті.

Кітаптың тұсаукесер рәсімін елімізге танымал сазгер, өнертанушы, Қазақстанның Еңбек Ері Илия Жақанов пен облыстық Ардагерлер кеңесінің төрағасы Мұрат Сақтайұлы Өтешов жүргізіп, оқырманға жаңа туындыны таныстырды.

Жиында алғашқы болып сөз алған Х.Досмұхамедов атындағы Атырау университетінің Құрметті профессоры, Қазақстан Жазушылар одағының мүшесі, Қазақстанның Құрметті журналисі Төлеген Жаңабайұлы кітаптың құрылымына тоқталып, шығармада еңбек адамының рухы мен төзімі, қарапайым тірліктің күрделі философиясы көркем тілмен өрілгенін атап өтті. Сондай-ақ, туындының жас ұрпаққа үлгі, өскелең буынға бағыт екенін ерекше айтты.

Салтанатты жиында өзге де ел ағалары сөз сөйлеп, кітап авторына алғыстарын білдіріп, тың туындының ұлт руханиятына қосылған құнды үлес екенін жеткізді.

Жиын соңында «Жаңа туған ай» кітабы салтанатты түрде оқырманға жол тартты.

Еркеназ ҚАЛИЖАН

Суреттерді түсірген Ерлан АЛТЫБАЕВ