Жұқа мұздан абай болыңыз

Ауа райы суытқанымен облыс көлеміндегі барлық су айдындарында және Жайық өзеніндегі мұздың асты жұқа, орта жағы дұрыс қатпаған, деп хабарлайды atr.kz

Бұл туралы Төтенше жағдайлар департаменті оқыс оқиғалардың алдын алу үшін облыс халқына ескерту жасады.

“Атырау облысы Төтенше жағдайлар департаменті қызметкерлерінің мұз үстінде балық аулаушыларға айыппұл салуға құқығы жоқ. Тек қауіпсіздік ережелерін айтып, алдын алу — құтқарушылардың басты міндеті.

Бүгінде Атырау облысының су айдындарында мұздың қалыңдығы жағалауларында 2 — 5 см аралығын құрайды, орта жағы әлі қатпаған. Бірақ мұның бәріне қарамастан, балықшылар, ойын ойнаған оқушы балалар мұзға шығып, өмірлеріне қауіп төндіруде. 

Тұрғындардан мұздағы қауіпсіз жүріс-тұрыс ережелерін қатаң сақтауды сұраймыз. Егер сіз су айдынындағы жазатайым оқиғаның куәгері болсаңыз немесе өзіңіз осындай жағдайға тап болсаңыз, шұғыл түрде 112 телефоны бойынша көмек сұраңыз”,- деп хабарлады департаменттен.

Атырау облысы ТЖД ескертеді:

— жұқа мұз аязды күндер орнатылғаннан кейін ғана күшті болады;

— қалыңдығы 15 см кем емес мұз адам үшін қауіпсіз деп саналады;

— қауіпсіз мұздың жасыл немесе көкшіл түсі болу керек;

— арнайы мұз өткелдері жабдықталған жерлерде су қоймаларынан өту керек;

— мұз тез ағатын, ағынды сулар мен соққы беретін жерлерде, сондай-ақ су өсімдіктері өсетін аудандарда, ағаштарға, бұталарға, қамыстарға жақын жерлерде берік емес;

— қар астында, сондай-ақ жағалауда мұз өте қауіпті.