Атырау облысы тарихи-өлкетану музейінің Құрманғазы аудандық бөлімшесінің ғимаратына осы музейдің негізін салушы және тұңғыш директоры, туған өлке тарихын терең зерттеуші, алғашқылардың бірі болып жинақтаушылардың көшбасшысы ретінде дараланған тұлға, ұлағатты ұстаз Зариф Бектенұлы Бектеновтың құрметіне арналған мемориалдық тақтайшаның ашылу салтанаты өтті.
Шарада аудан әкімі Бибоз Шаяхметов, облыстық тарихи-өлкетану музейінің басшысы Рашида Харипова, еңбек ардагері Иса Қараменов, академик-жазушы Өмірзақ Қажымғалиев, Ломоносов атындағы жалпы орта мектептің тарих пәнінің мұғалімі Сымбат Калымова ел тарихының жанашыры болып, өмірлік мұратын игі де қастерлі іске арнаған Зариф Бектенұлының есімі ұрпақтар жадында мәңгі сақталатынын, өлшеусіз еңбегі әрқашан дәріптелетінін айтып, жүрекжарды лебіздерін білдірді.
Зариф Бектенов – Құрманғазы ауданының төлтумасы. Бектен қарттың үш ұлының үлкені. Баланың үлкені болған соң өмірдің бар қиындығын сезініп өскен. Ол 1942 жылы тоғызыншы сыныпты бітіріп, еңбекке араласады. Кеңес әскері қатарына барып азаматтық борышын өтеп оралған соң кешкі мектепке барып орта білім алады. Сөйтіп, Абай атындағы қазақ мемлекеттік институтының тарих факультетіне оқуға түседі. Одан кейінгі өмірі біз жоғарыда баяндағандай мектептің тарихшы-өлкетанушы мұғалімі ретінде туған жерінде өтті.
Республикалық «Әкелер даңқы жолымен», «Менің Отаным – Кеңестер Одағы» конкурстарының бес мәрте жеңімпазы. Оның зерттеу еңбектерін 40-тан астам мұражай, Ресей, Беларусь, қазақ кеңес энциклопедиялары редакциялары пайдаланғаны туралы мәліметтер бар. Тарихшы мұғалім, тарихи-өлкетану мұражайын ұйымдастырушы әрі директоры ретінде Республика, облыс басшылығы тарапынан мақтау грамоталарымен, дипломдармен марапатталған.
Осындай құрметке лайықты жанға аудандық музей қабырғасына Зариф Бектеновке арналған мемориалдық тақтаны ашу рәсімі аудан әкімі Бибоз Шаяхметовке және облыстық тарихи-өлкетану музейіні басшысы Рашида Хариповаға ұсынылды. Бұдан кейін тарихшы-өлкетанушының «Аманат-арман» атты эссе-естелік кітабының тұсаукесері де ұйымдастырылды.
Шараға қатынасушылар З.Бектеновтың шығармашылығына арнайы дайындалған көрмені тамашалады.
Айнагүл ШАКУПОВА,
Құрманғазы ауданы.
