Заманауи білім беру инфрақұрылымындағы халықаралық жобалар
Қазақстан мен Қытай арасындағы білім және ғылым саласындағы стратегиялық ынтымақтастық аясында Лу Бань зертханаларының ашылуын аса маңызды әрі құптарлық бастама деп санаймыз.
Президент Қасым-Жомарт Тоқаев пен ҚХР Төрағасы Си Цзиньпиннің жоғары деңгейдегі келіссөздерінің нәтижесінде елімізде тағы екі Лу Бань зертханасының ашылуы – техникалық және кәсіптік білім беру саласына серпін беретін тарихи оқиға. Бұл зертханалар студенттер мен жас мамандарға өндірістік тәжірибеге бағытталған, заманауи жабдықтармен қамтамасыз етілген сапалы білім алуға зор мүмкіндік.
Лу Бань зертханалары инженерлік-техникалық кадрларды даярлау ісінде халықаралық стандарттарды енгізуге және отандық білім беру жүйесін жаңа деңгейге көтеруге ықпал етеді. Бұл – тек білім беру саласының ғана емес, сонымен қатар ел экономикасының түрлі салаларын технологиялық жаңғыртудың маңызды құралы.
Атырау мұнай және газ университеті — мұнай-газ саласына маманданған еліміздің жетекші техникалық жоғары оқу орындарының бірі ретінде — мұндай жобалардың маңызын жақсы түсінеді және оларды өңірлік деңгейде дамытуға мүдделі. Біздің университет халықаралық тәжірибені енгізу, цифрлық технологиялар мен инженерлік білім беру инфрақұрылымын жетілдіру бағытында жүйелі жұмыс жүргізіп келеді.
Болашақта осындай бірегей бастамалардың еліміздің батыс өңірінде де жүзеге асатынына сенім білдіреміз. Университетіміз Лу Бань зертханалары үлгісіндегі инновациялық жобаларды іске асыруға, ғылыми-техникалық ынтымақтастықты дамытуға және халықаралық серіктестікті нығайтуға әрқашан дайын.
Гүлзада ШАКУЛИКОВА,
С.Өтебаев атындағы Атырау мұнай және газ университетінің ректоры
