Ұшақтағы жарықша: қазақстандық әуекомпания мәлімдеме жасады
Air Astana ұшақ фюзеляжындағы жарықша туралы жариялымға қатысты пікір білдірді, — деп хабарлайды Tengritravel.kz тілшісі.
Air Astana баспасөз қызметі ақау анықталғанын растады, бірақ оның ұшу қауіпсіздігіне қауіп төндірмейтінін баса айтты.
«Құрылманың сындарлы емес жерінде, атап айтқанда жүк бөлігінің қаптамасының жеңіл панелі бекітілген жерінде ұзындығы 25 мм шамалы сызат табылған. Бұл ұсақ ақау ұшу қауіпсіздігіне әсер етпейді және ұшақты пайдалану барысында пайда болуы мүмкін», — делінген хабарламада.
Air Astana: «ұшу жарамдылығын сақтауды және пайдалану қауіпсіздігін қамтамасыз ете отырып, техникалық байқаудың белгіленген бағдарламасын қатаң сақтайды және барлық қажетті жөндеу жұмыстарын ұшақ өндірушісінің нұсқаулықтарына толық сәйкес орындайды», — деп жазды.
«Қазіргі уақытта ақау жойылып, ұшақ қолданысқа қайтарылды. Біз заңды жауапкершілікке тартпас үшін жалған ақпаратты жарияламауға кеңес береміз».
Еске салайық, бұған дейін желіде Көліктегі прокуратура Қазақстанның авиациялық әкімшілігімен бірлесіп Air Astana әуекомпаниясының әуе кемелерінің бірінде ақау анықтағаны туралы ақпарат пайда болды.
