Тазалық — баршаға ортақ міндет

Атырау облысында “Таза Қазақстан” жалпыұлттық бастамасы аясында “Таза аймақ” экологиялық акциясы өтті.

Бұл бастама 5 маусым – қоршаған ортаны қорғау күніне орай ұйымдастырылды. Ауқымды сенбілікке аймақтың атқарушы органдары, кәсіпорындар мен еріктілер белсенді қатысып, облыс көлемінде қоршаған ортаны қоқыстан тазарту жұмыстары жүргізілді.

Экологиялық шараның басты мақсаты – табиғатты аялауға шақыру, тұрғындардың экологиялық мәдениетін арттыру және қоршаған ортаға деген жауапкершілікті нығайту. Атырау қаласындағы сенбілік “Самал” шағынауданында өтті. Қатысушылар бұл аумақты қоқыстан тазартып, көпшіліктің экологиялық сана-сезімін қалыптастыруға үлес қосты.

Облыс бойынша өткізілген тазалық шарасына 4000-нан астам адам жұмылдырылды. Олардың қатарында “АМӨЗ”, “COCR”, “KPI”, “KUS” ЖШС, “Ембімұнайгаз”, “ҚазТрансОйл” АҚ секілді ірі мекемелердің қызметкерлері де бар.

— Сенбілік барысында жалпы ұзындығы 20 шақырым аумақ тазартылып, 52 тоннадан астам қоқыс жиналды. Оның ішінде 20 тонна шыны, 12 тонна пластик, 8 тонна резеңке, 5 тонна қағаз және 5 тонна металл қалдығы болды. Барлық жиналған қалдық арнайы қоқыс полигонына жеткізілді,- деді Атырау облысы бойынша Экология департаментінің басшысы Асқар Жүсіпов.

Аймақта ұйымдастырылған бұл акция – экологияны сақтау бағытындағы маңызды қадамдардың бірі. Табиғаттың тазалығы мен болашағы тек мамандардың емес, барша жұрттың ортақ жауапкершілігіне айналғанда ғана экологиялық жағдайдың оңалуына жол ашылады.

Тоғжан ЕРМЕК