Танысын балағаттағаны үшін 56 мың теңге айыппұл салынды

Атырауда танысын балағаттаған азаматқа 56 мың теңге айыппұл салынды. Басқа адамның абыройы мен қадiр-қасиетiн әдепсiз түрде кемсiткен айыпталушыға қатысты қылмыстық іс Атырау қаласының №2 сотында қаралған.

Анықталғандай, сотталушы Ә.А. өзінің танысы А.М.-ның жұмыс орны — сұлулық салонына келіп, ол жерде жанжал шығарып, оған дөрекі сөздер айтқан.

Сот отырысында сотталушы өз кінәсін мойындамай, бұрын жәбірленуші А.М.-мен кездескенін, бірақ жанжал кезінде оны балағаттап, кемсітпегенін айтты.

Жәбірленуші сотта олардың өзара татуласулары мүмкін еместігін баяндап, оған заң бойынша жаза тағайындауды сұрады.

Сот үкімімен айыпталушы Қылмыстық Кодекстің 131-інші бабының, 1-інші бөлігімен кінәлі деп танылып, оған 25 айлық есептік көрсеткіш мөлшерінде, яғни 56 725 теңге айыппұл түріндегі жаза тағайындалды.

Үкім заңды күшіне енген жоқ.

Айдос Қарабала

Фото nur.kz сайтынан алынған