Сенат депутаты педофилдерді өлім жазасына кесуді ұсынды

Atr.kz/11 қыркүйек, 2019 жыл.  Сенат депутаты Мұрат Бақтиярұлы балалар мен әйелдерге зорлық-зомбылық көрсеткендерді өлім жазасына кесуді ұсынды.

Мұрат Бақтиярұлының айтуынша, әйелдерге зорлық-зомбылық, әсіресе балаларды зорлау, болмаса адам ұрлау ауыр қылмыстың қатарына жатады.

«Қылмыстық кодекс бойынша, өкінішке қарай, бұларға берілетін жаза әлі де болса жеңілдеу. Былтыр, алдыңғы жылдары бір топ сенатор ауыр қылмыстарға өлім жазасын беруді ұсынған едік. Өкінішке қарай, қолдау таппады. Сондықтан да мен парламент мүшесі ретінде айтарым, балалар мен әйелдерге қарсы жасалатын ауыр қылмыстарға өлім жазасын беруіміз керек», — деді сенатор.

Қазақстан президенті Қасым-Жомарт Тоқаев өз жолдауында осы мәселені көтерген болатын. Мемлекет басшысы адам зорлау, педофилия, есірткі тарату, адам саудасы, әйелдерге қарсы тұрмыстық зорлық-зомбылық және басқа да ауыр қылмыстар үшін, әсіресе балаларға қарсы жасалған қылмыстар үшін жазаны жедел түрде қатаңдатуды тапсырды.

Осыдан кейін бас прокуратура аса ауыр қылмыстар үшін жазаны күшейтуге арналған жоспарды жария етті. Оған сәйкес, балаға қатысты зорлау әрекеті үшін өмір бақи бас бостандығынан айыру немесе 20 жылдан кем емес уақытқа бас бостандығынан айыру жазасы болады.

Дереккөз: «Sputnik Қазақстан»