САЛҒЫРТТЫҚТЫҢ САЛДАРЫ ҚАНДАЙ?

«Осылайша, Атырау қалалық білім бөлімі мен Қызылқоға ауданы бойынша бір құжаттан, Жылыой ауданы бойынша сегіз құжат, Атырау облыстық көлік бақылау инспекциясы бойынша бір құжат тұтынушының қолына тиісті мерзімнен кеш түскен. Мамандар тарапынан болған мұндай салғырттықтар туралы мәліметті Халыққа қызмет көрсету орталығынан алып отырмыз» деді Әлібек Ермекқали.
Мемлекеттік органдардың құжат рәсімдеуде марғаулық танытатынын Атырау облысы әкімі аппаратының бөлім меңгерушісі Тұраргүл Ізбасова мен облыстық халыққа қызмет көрсету орталығы директорының орынбасары Тұрлан Нұржанов та растады. «Өңірде халықтың саны аз болғанымен, құжат айналым бойынша біз алғашқы бестіктеміз. Мемлекеттік органдар тарапынан себепсіз бас тартулар мен кері қайтарулар болып жатады. Осындай фактілер облыстық мемлекеттік сәулет-құрылыс бақылау және лицензиялау департаменті, облыстық жылжымайтын мүлік жөніндегі орталық, Атырау қалалық Әділет басқармасы, Атырау қалалық білім бөлімі тарапынан орын алуда» деген Тұрлан Амангелдіұлы кейде мемлекеттік органдардың заңды күшін әлдеқашан жойған үй кітапшасын да сұратып отыратынын сынға алды. «Мұндай сұрату тіпті ақылға сыймайды. Заңды күшін жойған құжаттың одан әрі қандай кәдеге асуы мүмкін?» дейді сала маманы.
Сонда бұл мекеме мамандарының сауатсыздығын көрсете ме? Осы мәселені қозғаған қоғамдық кеңес төрағасы Мұхит Избанов қағазбастылықты қолдан туғызатын мекеме мамандарына нақты шара алуды міндеттеді.

Баян ЖАНҰЗАҚОВА.