Оңалту мамандарын оқыту жобасы басталды
«БолашакК» қоғамдық қоры ExxonMobil компаниясының қолдауымен оңалту және коррекциялық сала мамандарын оқытуға арналған ауқымды жобаны іске қосты. Жобаның басты мақсаты – ерекше қажеттіліктері бар балаларға сапалы оңалту қызметін көрсету үшін кәсіби мамандар даярлау және ата-аналарға үй жағдайында көмек көрсету әдістерін үйрету.
Бағдарлама шеңберінде емдік және адаптивті дене шынықтыру, массаж, сенсорлық интеграция және дефектология бағыттары бойынша оқу курстары, тәжірибелік семинарлар мен тренингтер ұйымдастырылуда. Жобаның алғашқы кезеңі ретінде 2025 жылғы 25–29 тамыз күндері «БолашакК» оңалту орталығы базасында 55-тен астам маман мен ата-ананың қатысуымен үш бағыт бойынша оқыту семинарлары өткізілді: кинезиотерапия, емдік массаж және логопедиялық түзету.
-Семинарлар тәжірибеге негізделіп, қатысушылармен ашық пікір алмасу және практикалық дағдыларды дамыту форматында өтті. Мұндай шаралар мамандардың кәсіби дамуына ғана емес, ата-аналардың да өз балаларына көмектесуге деген сенімін арттыруға ықпал етеді,- дейді кинезиотерапевт-тренер Гүлмира Жұмашева.
Айта кетейік, жоба алдағы уақытта өңірлік деңгейдегі оңалту қызметтерінің сапасы мен қолжетімділігін арттыруға, мамандарды кәсіби тұрғыда дамытуға және ерекше қажеттіліктері бар балалар мен олардың отбасыларын кешенді қолдауға бағытталмақ.
Тоғжан ЕРМЕК
