Құлаған мүсінге жауапты мердігерге сот үкімі шықты
Атыраудағы сот 2023 жылы Жеңіс саябағында ескерткіш құлап, қыз баланың қаза болуына қатысты үкім шығарды.
ОҚИҒАНЫҢ МӘН-ЖАЙЫ
Сот мәліметінше, Атырау қаласының әкімдігі екінші дүниежүзілік соғыстың батырларына арналған 14 мүсінді дайындау үшін демеушілер мен мердігерді тартқан. Алайда айыпталушы мердігер ретінде мүсіндерді жасау кезінде құрылыс нормаларын бұзған. Соның салдарынан мүсіндердің бірі құлап, екі кішкентай бала мен олардың әкесін басып қалған. Бір бала қайтыс болып, қалған екеуі орташа дәрежеде дене жарақатын алған.
Прокурор айыпталушыға 4 жыл бас бостандығынан айыру жазасын сұрады. Айыпталушы өз кінәсін мойындамады. Жәбірленушілер қатаң жаза тағайындауды талап етті.
СОТ ШЕШІМІ
Айыпталушының әрекеті Қылмыстық кодекстің 306-бабы 3-бөлімінен 279-бабы 1-бөліміне (сәулет, қала құрылысы және құрылыс қызметі саласындағы нормативтерді бұзу салдарынан адам өліміне әкеліп соғу) қайта сараланды. Бұл бап бойынша 6 жылға дейін бас бостандығынан айыру жазасы көзделген.
Сот үкім шығару кезінде келесі жайттарды ескерді: сотталушының кәмелетке толмаған баласы бар, ол алғаш рет орташа ауырлықтағы қылмыс жасаған, жағдай кездейсоқ жайттардың тоғысуымен болған.
Нәтижесінде, сот Б.-ны ҚК 279-бабы 1-бөлігі бойынша кінәлі деп танып, 3 жылға бас бостандығынан және 3 жыл бойы сәулет, қала құрылысы және құрылыс қызметімен айналысу құқығынан айырды.
АМНИСТИЯ БОЙЫНША ЖЕҢІЛДІК
– Амнистия туралы актіге сәйкес бас бостандығынан айыру мерзімі жартысына қысқартылды. Соңғы шешім бойынша Б.-ға 1 жыл 6 айға бас бостандығынан айыру және 3 жыл бойы сәулет, қала құрылысы және құрылыс қызметімен айналысу құқығынан айыру жазасы тағайындалды, — деп мәлімдеді сотта.
Айыпталушыдан әрбір жәбірленушінің пайдасына моральдық зиян үшін 10 млн теңгеден және емделуге кеткен шығындар өндірілді.
Сот үкімі заңды күшіне енген жоқ
ulysmedia.kz
