Қазақстанның атом энергетикасын дамыту: халықаралық серіктестіктің жаңа мүмкіндіктері мен болашағы
Тәуелсіз сарапшы ретінде, Қазақстанның атом энергетикасын дамыту туралы қабылданған шешімнің стратегиялық маңыздылығын атап өту қажет. Елдің энергетикалық тәуелсіздігін қамтамасыз ету және өндірістік секторды дамыту үшін атом энергетикасының үлесі зор болады. Президент Қасым-Жомарт Тоқаевтың бүгінгі сұхбатында айтылғанындай, атом электр стансаларын салу жобасының халықаралық консорциум арқылы жүзеге асырылуы өте маңызды, себебі бұл шетелдік жетекші компаниялардың тәжірибесі мен технологияларын енгізуге мүмкіндік береді.
«Росатом» және Қытайдың компанияларының қатысуы атом энергетикасының қауіпсіздігі мен тиімділігін қамтамасыз етуге үлкен үлес қосады. Бұл компаниялардың әлемдік деңгейдегі тәжірибесі мен жоғары технологиялық мүмкіндіктері жобаның сәтті жүзеге асуына жол ашуы тиіс. Сонымен қатар, Батыс елдерінің қызығушылығы жобаның халықаралық деңгейде қабылдануына және оның сапасына деген сенімділікті арттырады.
Қазақстанның атом энергетикасын дамытуы – бұл тек энергия өндіру мәселесін шешіп қана қоймай, сондай-ақ жаңа жұмыс орындарын ашуға, жоғары білікті мамандарды даярлауға және елдің жалпы индустриалды дамуын жеделдетуге мүмкіндік береді. Атом энергетикасының болашағы зор және Қазақстанның осы салада көшбасшы болуға мүмкіндігі мол. Бірақ бұл жобаның қауіпсіздігі мен экологиялық әсерін мұқият бақылап, барлық халықаралық стандарттарға сай келуі қажет екенін ескерген жөн.
Тельман ШУРИЕВ,
тәуелсіз сарапшы
