Қазақстандықтар енді ақысы төленген бес күндік демалысқа шыға алады
Atr.kz/17 қазан, 2019 жыл. Жұмыс берушілер қарамағындағы қызметкерлерге скринингтен өту үшін бес күн әлеуметтік демалыс беруге міндеттеледі. Бұл туралы бүгін денсаулық сақтау министрі Елжан Біртанов айтты.
Жұмыс берушілердің адамдардың денсаулығын сақтаудағы жауапкершілігін күшейту мақсатында қол астындағы қызметкерлеріне скринингтен өту үшін міндетті әлеуметтік демалыс беру көзделіп отыр. Жаңа норма «Халық денсаулығы және денсаулық сақтау жүйесі туралы» кодекс жобасында жазылған.
«Барлық азаматтың тегін скринингтен өтуге құқығы бар. Сондықтан жұмыс берушілер өз жұмысшыларына ақысы төленетін демалыс беруге міндетті. Егер әлеуметтік демалыс беруден бас тартса, онда жұмыс берушіге айыппұл салынады», — деді Біртанов мәжіліс кулуарында.
Министр әлеуметтік демалыс бес күнді құрайтынын және ол қазіргі еңбек демалысынан бөлек берілетінін нақтылады. Егер жұмыс беруші әлеуметтік демалыс бермесе, қазақстандықтар еңбек және денсаулық сақтау министрліктеріндегі құзырлы органдарға шағымдана алады.
Дереккөз: Sputniknews.kz
