Қазақстанда журналистерге жаңа талаптар енгізілмек

Республика Ақпарат және қоғамдық даму министрлігі БАҚ үшін кәсіби стандарттар туралы бұйрық жобасын талқылауға шығарды. Енді журналистер тергеу жүргізу, редакциялау, дереккөздермен жұмыс істеу дағдыларын меңгеріп, құқықтық және этикалық нормаларды білуге міндеттеледі.

Стандарттар журналистердің біліктілігіне қойылатын талаптарды анықтайды: жаңалықтарды құрылымдау, ақпаратты талдау және оны аудиторияға логикалық әрі түсінікті етіп жеткізу қабілеті. Сонымен қатар, оқиғаларды заңдар мен этиканы бұзбай жариялауға ерекше көңіл бөлінеді.

Бұйрық жобасын «Ашық НҚА» сайтында 18 желтоқсанға дейін талқылауға болады.

Сурет: egemen.kz