Қаламгерге – құрмет

Өлке журналистикасы аға буын өкілдерінің бірі, «Ерен еңбегі үшін» медалінің иегері, Қазақстанның Құрметті журналисі, Т.Амандосов атындағы Атырау облысы әкімі сыйлығының лауреаты, Қызылқоға ауданының Құрметті азаматы Нұрлан Қабылов жоталы жетпіс жасқа толды.

Атаулы датаға орай мерейтой иесін «Атырау-Ақпарат» медиахолдингінің бас директоры Нұрболат Елеусінов қабылдады. Кәсіпорын басшысы мерейгерге жылы лебізін білдіріп, облыс әкімі Серік Шәпкеновтің құттықтау хатын салтанатты жағдайда табыстады. Ұжым атынан қазақы дәстүрмен мерейгердің  иығына шапан жапты.

Мерейтой қарсаңында аудандық, облыстық және республикалық мерзімді басылымдарда бас редакторлық қызметті абыроймен атқарған қарымды қаламгер Нұрлан Достанұлының «Армандары алдамаған адаммын» атты кітабының тұсаукесер рәсімі өтті. Оның тұсауын кесу құрметіне белгілі жазушы, «Құрмет» орденінің иегері, Қазақстанның Құрметті журналисі Төлеген Жаңабай мен оның әріптесі, Ақпарат саласының үздігі Әбілхан Төлеуішев ие болды.

Жинаққа автордың әр жылдары жазылған өлеңдері, естеліктері мен отбасылық фотосуреттері енген.

Дәулетқали АРУЕВ