![Ораза ұстаудың пайдалары қандай? 1 91876](https://atr.kz/wp-content/uploads/2019/05/91876.jpg)
Ораза ұстаудың пайдалары қандай?
Atr.kz/17 мамыр, 2019 жыл. 27 жыл ауыз бекіткен дәрігер ораза ұстаудың пайдасы туралы айтты.
Дәрігер Марат Сәрсенбаев ораза ұстау адам денесін артық май мен зиянды заттардан арылтып, ағзаның жасаруына септігін тигізетінін айтты.
Маманның пікіріне сүйенсек, ауыз бекіту асқорыту жүйесін жақсартып, қартаю процесін тежейді.
![Ораза ұстаудың пайдалары қандай? 2 640x480 1382351658 dini agymdar](http://atr.kz/wp-content/uploads/2019/05/640x480_1382351658_dini-agymdar.jpg)
«Ораза адамның организмін тазалайды. Адам қарны ашқан кезде әлсіз жасушалар өздігінен жойылып, аштыққа қарсы тұру үшін адамның ішкі организмдері белсенді жұмыс істейді. Нәтижесінде ағза артық майлардан, шлактардан арылады. Сондықтан ораза ұстаған адамның организмі бір айда толығымен тазарып шығады. Бұл адам ағзасындағы жасушыларды жаңартып, ас қорыту жүйесін жақсартады», — дейді Марат Сәрсенбаев.
Сұқбат барысында дәрігер жапониялық ғалым Есинори Осуми ашығудың адам организіміне пайдалы екенін дәлелдеп, Нобель сыйлығынан алғанын мысалға келтірді.
Ашығу көптеген аурудың алдын алуға септігін тигізеді.
«Мен қант диабетімен ауырамын. Дәрігерлер бұл диагнозды осыдан 8 жыл бұрын қойды. Инсулин қабылдамаймын. Бірақ дәрігердің бақылауындамын. Соған қарамастан ораза ұстап жүрмін. Бүгінде ағзамдағы қанттың мөлшері қалыпты нормада. Ауыз бекіткеніме 27 жыл болды», — дейді маман.
Марат Сәрсенбаев еске алғандай, алғашқы жылдары ауыз бекіткенде біраз қиналып, бірақ кейін организмі үйренген екен. Дәрігер Оразаны арықтау немесе денсаулығын жақсарту үшін емес, мұсылманның парызы болған соң ұстап жүргенін атап өтті.
Әңгіме барысында ол қандай науқастарға ауыз бекітуге болмайтынын айтты.
Биылғы пітір садақаның мөлшері – 300 теңге.
«Күндіз дәрі ішсеңіз, қант диабетімен ауырып, инсулин қабылдасаңыз, қатты ауырып қалсаңыз, ауыз бекітуге болмайды. Сондай-ақ гемодиализ арқылы ем қабылдап жүргендерді атап өткен жөн. Ондай науқастар 4 сағат бойы қанын тазартуға мәжбүр. Олар да ораза ұстай алмайды», — дейді Марат Сәрсенбаев.
Айта кетейік, биыл Ораза 6 мамырда басталып, 30 күнге созылады. Қасиетті Қадір түні – 31 мамырдан 1 маусымға қараған түн. 5 маусымда Ораза айт мейрамы басталады. Құрбан айт 11-13 тамыз күндері болады.
Дереккөз: «Спутник Қазақстан»