Махамбет ауылында жаңа хоккей алаңы ашылды
Махамбет ауданы Махамбет ауылдық округінде демеушілік қолдаумен салынған жаңа хоккей алаңының салтанатты ашылуы өтті.
Аудан әкімдігі баспасөз қызметінің хабарлауынша, аталған жоба 2023 жылы өткен «Туған жерге – тағзым» форумында ұсынылған бастамалардың бірі болатын. Форум барысында Махамбет ауылында туып-өскен азаматтар туған жерді дамытуға бағытталған түрлі жобалармен танысып, ел игілігіне үлес қосуға ниет білдірген еді. Осы игі бастаманың нәтижесінде «Alimay» ЖШС-нің жетекшісі Ерлан Андашевтың демеушілігімен хоккей алаңы салынып, ауыл жастарының спортпен шұғылдануына мүмкіндік жасалды.
Салтанатты шарада аудан әкімі Қайрат Нұрлыбаев туған жерге жанашырлық танытып, спортты дамытуға қосқан үлесі үшін Ерлан Андашевқа алғыс білдіріп, осындай бастамалардың өңірдің өркендеуіндегі маңыздылығын атап өтті.
Жаңа алаңның ашылуы ауыл тұрғындары үшін үлкен қуанышқа айналып, салтанатты рәсім ардагерлер мен жастар арасындағы достық хоккей кездесуімен жалғасын тапты.
Бұл жоба ауыл жастарын спортқа баулып, салауатты өмір салтын қалыптастыруға тың серпін берері сөзсіз.
Алтыншаш НӘСІПҚАЛИҚЫЗЫ
