IWAS — 2019: атыраулықтар 2 алтын, 2 күміс және 4 қола медаль иеленді (+ ФОТО)
Atr. kz / 19 – ақпан. Біріккен Араб Әмірлігі мемлекетінің Шардже қаласында бүкіләлемдік IWAS — 2019 ойындары өтіп, аталмыш байрақты додада сынға түскен атыраулық үстел теннисшілер 2 алтын, 2 күміс және 4 қола медаль еншілеп қайтты.
Жұптық сайыста алматылық Курпетаевпен бірге өнер көрсеткен жерлесіміз Али Махулбеков турнир барысында тамаша ойын өрнегімен ерекшеленіп, қарасыластарынан басым түсіп отырды. Осылайша, олар дүбірлі жарыстың чемпионы атанды. Атыраулық спортшы сонымен қоса жекелей сында да алдына жан салмай екінші мәрте алтын медальді мойынына тақты.
Ал, жұптық сайыста Қостанай және Павлодар спортшыларымен бірлесіп шыққан Берекет Ақжігітов ақтық сында ғана есе жіберді. Тағы бір күміс медальді жекелей сында теннисшіміз Ерлан Қазиев иемденді.
Сондай-ақ, қола медальді жекелей жарыста Али Махулбеков, Кенгес Конгиев, Берекет Ақжігітовтер, жұптық сында Ерлан Қазиев мен Кенгес Конгиевтер қанжығаларына байлады.
Гүлнар Иманалиева жаттықтыратын бұл спортшылар бүгінгі күні елімізде бірегей арнайы нысан болып саналатын облыстық мүгедектер спортық клубында дайындалып жүр.
Мұратбек ЖАҢАБАЙ
