Еңбек ер атандырады

Конституция күнімен тұспа-тұс «Ерен еңбегі үшін» медалін алу өмірімдегі ең ерекше сәттердің бірі. Бұл марапатты мен тек өзімнің ғана емес, маңдай терімен адал еңбек етіп жүрген барша жұмысшылардың атынан қабылдадым деп білемін. Себебі биыл мемлекетімізде «Жұмысшы мамандық жылы» жарияланды. Бұл қарапайым еңбек адамының мәртебесін көтеруге, маңдай терімен ел экономикасына үлес қосып жүрген азаматтарға деген құрметтің белгісі.

Мен өндірісте қарапайым оператор болып еңбек етіп келемін. Біздің салада әрбір сәт қырағылық пен ұқыптылықты, адалдық пен жауапкершілікті талап етеді. Көпшіліктің көзіне көрінбесе де, біздің еңбегіміз ел дамуының іргетасын қалайды. Сондықтан бұл марапат ұжымымыздың ортақ табысы.
Ата Заңымызға адал болу – елге адал қызмет етудің алғышарты. Мен үшін ең үлкен мәртебе адал еңбегім арқылы мемлекетімнің дамуына үлес қосып, балаларымыздың жарқын болашағына қызмет ету.

Саламат ИМАНҒАЗИЕВ,
«БатысАльянсСтрой» ЖШС операторы