Домбыра әр аулада: Атырауда Ұлттық домбыра күніне арналған республикалық челлендж кеңінен қолдау тапты 

Күй әуені Атырау өңірін тербетті: бүгін аталып өтіп жатқан Ұлттық домбыра күніне орай қала тұрғындары – мектеп оқушылары мен кәсіби музыканттарға дейін қазақ композиторларының туындыларын орындап, ел көлеміндегі челленджге үн қосты, деп хабарлайды AtyrauPress тілшісі.

Атырау қаласында алаңдарда, мәдениет үйлерінде, сахналар мен тіпті көшелерде де домбыраның күмбірі естілді. Ұлттық аспап күніне орай, әсіресе жастар қауымы белсенділік танытып, Ұлы даланың рухани шежіресіне айналған күйлерді орындады.

Мектеп оқушылары, студенттер, өнер мектептерінің тәрбиеленушілері мен халық аспаптар оркестрінің әртістері – барлығы бұл кең ауқымды бастамаға өз үлестерін қосты. Көпшілік әлеуметтік желілерде өнер көрсеткен сәттерін бөлісіп, аулаларда шағын концерттер ұйымдастырып, музыканың көмегімен ел бірлігін сезінді.

Музыкалық флешмоб тек облыс орталығымен шектелмей, аудан-аумақтарға да кеңінен таралды. Құлсарыдан Құрманғазыға дейін – «Адай», «Ерке сылқым», «Балбырауын» күйлері орындалып, уақыт пен ұрпақ сабақтастығын паш етті.

Домбыра – қазақтың рухани болмысы мен бірегейлігінің символы ретінде өзінің біріктіруші күшін тағы да дәлелдеді.
Атырау жұртшылығы бұл бастаманы шынайы ықыласпен қабылдап, домбырамен үндескен жүректермен бірлікті сезінді.

Мақпал Дәулет