БАС ҚҰЖАТТЫҢ БАЙЫПТЫ БАҒДАРЫ

— Жыл сайынғы Елбасының Жолдауын насихаттайтын облыстағы сегіз насихаттық топтың бірі ретінде дәстүрлі сапармен келгендегі мақсатымыз — өміріміздің өзекті арқауына, ілгері дамуымыздың негізгі тетігіне айналған «Қазақстан – 2050» стратегиясы – қалыптасқан мемлекетіміздің жаңа саяси бағыты» аталатын аса маңызды құжаттың мәні мен сипатын аша түсу, — деді Нұртас Мұхтарұлы. – Онда халқымыздың әлеуметтік ахуалына серпін беру басым бағыт алғанын байқауға болады.
Шешен бұдан әрі өндіріс және жаңа технологиялар саласындағы салық салу нысандары үшін қолайлы салық режимін енгізу қажеттігі туындап отырғанын қаперге берді.
Насихаттық топ маңызды құжатта ауыл шаруашылығын қайта өңдеуде және саудада фермерлік, шағын және орта бизнесті дамытуға баса мән беріліп отырғанына айрықша тоқталды.
Сонымен қатар кәсіпкерлікті дамыту арқылы жаңа жұмыс көздерін ашу, сапалы білім беруді және ұлт денсаулығын жақсартуға серпілісті қадам жасау мәселелері де – алдағы міндеттердің арқауында өз шешімін таппақ.
Насихаттық топтың мүшелері ауыл және қала тұрғындарының балабақша, ауыз су, жолға қатысты өздерін толғандырып жүрген сауалдарын ықылас қоя тыңдап, қаперге алды.

Қаржау ОРАЗБАЕВ,
меншікті тілшіміз.
Жылыой ауданы.